Durante Wintertuin Curaçao Festival riba djasabra 19 di sèptèmber, e kompetensia literario di Moving Voices a duna bida na e Ambiente Stage. Ku mas di 60 inskripshon for di ex- Antiyas Hulandes, Aruba, i Surnam, e edishon akí a demostrá un biaha mas kon poderoso i konektivo idioma ta den nos region. Despues di un bataya intenso i di kalidat haltu, Leonardo Phillips a resultá ganadó apsoluto di e kompetensia.
E kompetensia Moving Voices ta parti di Wintertuin Curaçao su programa mas amplio di desaroyo di talento, ku tin como meta pa fortalesé kolaborashon kreativo i oportunidadnan den e region di Caribe. Kuminsando e aña akí, Wintertuin Curaçao Festival a establesé un kompetensia anual di presentashon literario direktamente ligá na e tema di e festival di e aña.
E anochi riba Ambiente Stage a kuminsá ku presentation di e tòp 10 partisipantenan selektá. Partisipantenan di henter e region a hasi nan presensia konosí: e gran mayoria di e kandidatonan a bini for di Kòrsou, akompañá pa representantenan di Aruba: Leonardo Phillips i Destiny Bernabela i for Sürnam Maggie Schmeitz i Eline Marengo.
E normanan tabata eksepshonalmente haltu. E kuerpo di hurado profeshonal — ku a konsistí di Lusette Verboom, Richailine Elisa, i Tyson Hill — a enfatisá ku a husga basá riba kriterionan estrikto i multifasetiko:
“Komo hurado, nos a wak no solamente e presensia riba esenario i karisma, pero igualmente e profundidat supstansial di e tekstonan, e interakshon ku e públiko, i si nan a tene nan mes na tempu máksimo,” e hurado a deklará. “Tabata impreshonante pa mira kon e partisipantenan di e vários islanan i pais a trese nan propio bos i kultura úniko riba esenario.”
Despues di e promé buelta di 10 presentashon, e hurado a skohe 5 finalista ku mester a subi esenario atrobe pa presentá un di dos obra. Den e fase desisivo akí, e finalistanan a duna tur ku tin i a hasi e kompetensia sumamente emoshonante. Despues di deliberashon kuidadoso i e kontamentu di e puntonan individual di kada miembronan di hurado, e premionan a yega na e resultado final di e siguiente manera:
1er lugá: Leonardo Phillips (Aruba) – A risibí XCG 1.000 + un programa di guia individual. E programa aki ta adaptá na e partisipante i ta enserá entre otro desaroyo di kontenido profundo i e oportunidat pa aktua den eksterior.
2do lugar: Noemi Elisa (Curaçao) – A risibí XCG 500 + 5 seshon di guia individual.
Di 3 lugá: Destiny Bernabela (Aruba) – A risibí XCG 250 + participacion grátis na un kurso di Creative Writing Academy.
E organisashon Wintertuin Curaçao ta wak bèk ku orguyo riba un anochi eksitoso i emoshonal kaminda talentonan regional a haña un esenario pa selebrá tur loke ta konektá nos.
