Nos ta bibando den un tempo, caminda hende a perde temor di Dios y respet pa nan prohimo.
Di berdad e tempo ta trabahoso, pasobra hende cada dia ta consenti mas cu maldad, y no ta respeta bida di otro.
Wak bon pa bo mes cu camera, no ta stroba ladron ni criminal di comete nan bagamunderia.
Inmoralidad ta wordo haci den bista di tur hende.
Antes un adulterio tabata scondi , awor aki adulterio a bira un show.
Antes bo ta sinti holor di droga( Marihuana) , awor aki marihuana ta wordo huma publicamente.
Un adicto a perde berguensa di usa su droga caminda hende ta mire.
Hende no tin berguensa pa horta, nan ta drenta den un supermarket cu e plan pa piki cos yena tas, of hinca bao di panja y sali sin paga.
Tin hende ta kere cu tur caminda cu nan bay nan por aplica nan vocabulario sushi, y sin control.
Orguyo ta pone hende no tin respet, y nan kier permanece den scuridad, pa motibo di duresa di curason.
Ora tin violencia hende ta para graba, pero toch no ta yama polis.
Laga nos no duda cu nos ta bay yega na e tempo cu hende lo bende informacion na polis, manera ta sosode den pais grandi.
Tur esaki ta pasa pasobra hende a bira comfortabel cu pica y inmoralidad, y nos ta biba den un tempo caminda ley ta tolera y aproba maldad y inmoralidad.
Un tempo caminda esun cu ta haci cos robes den bista di Dios kier wordo respeta y e no kier wordo coregi, asina fuerte e enganjo di diabel a penetra den mente di hende.
Den e buki di Isaias 5:20 : E palabra di Dios ta bisa: Ay di esnan cu ta yama loke ta malo bon, y loke ta bon malo.
Loke ta scuridad lus, y loke ta lus scuridad,loke ta marga dushi, y loke ta dushi marga.
Efesionan 5:11 ta bisa: No participa den obranan di infructifero di scuridad, ma mas bien expone nan.
Si bo yiu ta haci malo, no sconde e cos, si bo esposa of esposo ta haci malo tampoco no dek nada, pero expone e maldad, bo no por biba comfortabel caminda bo sa cu maldad ta tumando lugar.
Pasobra ora hende ta haci malo conscientemente ta nifica consenshi sushi, duresa di curason,falta di temor di Dios y falta di respet pa hende.
Ta imposibel lanta yiu den un cas caminda no tin ordo, no tin respet, no tin coreccion y no tin disiplina, e ora ey nos ta nota cu e mayor ta iresponsabel y enbes di lanta mucha cu respet e mes ya pone nan trompica.
Romanonan 12:9 ta bisa: Laga amor ta sin hipocrecia. Aborece loke ta malo, tene firme na loke ta bon.
Boso cu ta stima Senjor, odia maldad, E ta preserva alma di su santonan, E ta libranan for di man di e malbado. ( Salmo 97:10).
E temor di Senjor ta pa odia maldad,orguyo, arogancia,y mal caminda y un boca perverso mi ta odia.( Proverbionan 8:13).
Of boso no sa cu boso curpa ta e tempel di Spirito Santo, Kende ta den boso,Kende boso tin di Dios, y cu boso no ta pertenece na boso mes. Pasobra boso a wordo cumpra pa un preis, pesey glorifica Dios den boso curpa.( 1 Corintionan 6:19-20).
Palabra di Dios ta fuerte , firme y berdadero, y hopi biaha hende no kier tende e berdad.Pero ta bon pa tur hende lesa 1 Pedro 3:10 y sa con bo ta reconoce e yuinan di Dios y e yuinan di diabel.
Sinceramente,Pastor Marcel Balootje
