Fraccion di MEP a entrega preguntanan parlamentario na e minister di Salubridad tocante e situacion alarmante di cuido di partera na Aruba. MEP ta exigi claridad y accion urgente pa garantisa continuidad, calidad y seguridad di cuido pa mama y baby.
E cantidad di partera a baha di 8 na 2024 pa 4 na 2025, y pa 2027 por keda solamente 3, mientras cu Aruba tin mester di 6 pa 7 partera. Desde april 2024, e sector a alerta AZV y a presenta diferente proposicion, pero ainda no tin un solucion definitivo.
MEP a puntra, entre otro, pakico e solucion cu parteranan a propone ainda no ta implementa, con ta trata e tardansa di 11 pa 12 luna pa AZV paga declaracionnan, y dicon no ta dunando atencion na e investigacion di PLUS Accountants. Tambe MEP ta exigi medida pa preveni burnout, falta di personal y riesgo pa seguridad di mama y baby.
MEP a pidi un plan di accion concreto, cu financiamiento, responsabel y fecha di implementacion, y kier sa cua medida di emergencia Gobierno lo tuma si no yega na un acuerdo cu AZV.
E minister tin tres siman pa contesta e preguntanan: e fecha limite ta 12 di november 2026.
MEP ta considera cu cuido di partera ta demasiado importante pa keda sin solucion. Dos bida ta depende di e cuido aki. Aruba no por sigui warda.
