Prome Minister Mike Eman y Minister di Turismo, Transporte y Labor, Wendrick Cicilia, a reafirma importancia di aumenta salario minimo pa percura cu e crecemento economico cu Aruba ta experimenta beneficia henter pueblo. Na salida di un reunion cu lider di fraccion di VVD den Tweede Kamer, Ruben Brekelmans, ambos minister a enfatisa cu prosperidad economico mester traduci den un miho poder di compra y calidad di bida pa empleado, particularmente esnan cu ta gana salario minimo.
Durante e reunion, Prome Minister Mike Eman tabata acompaña pa Minister di Turismo, Transporte y Labor, Wendrick Cicilia, y Minister Plenipotenciario di Aruba na Hulanda, Mildred Schwengle. Prome Minister Eman a indica cu e conversacionnan cu diferente lider di fraccion politico na Hulanda ta confirma cu e reto pa conecta desaroyo economico cu bienestar di pueblo no ta exclusivo di Aruba. Na Hulanda tambe tin preocupacion cu un parti di poblacion ta keda atras, mientras economia ta sigui crece. Segun Eman, e reconocemento aki ta fortalece su conviccion cu Aruba mester sigui cu e direccion pa percura cu e prosperidad genera pa entre otro turismo beneficia tur ciudadano.
Eman: Aumento di salario minimo no ta negociabel
E prome minister a enfatisa cu Gobierno ta dispuesto pa dialogo tocante posiblel compensacion pa sector priva, pero cu e necesidad pa aumenta salario minimo no ta un punto di discusion. “Nos no ta habri pa ningun discusion riba si e salario minimo aki tin cu subi of no. E tin cu subi”, Eman a declara. Eman a menciona particularmente e empleadonan di housekeeping den e hotelnan di cinco strea, cu ta traha diariamente pa mantene e calidad di servicio cu Aruba ta ofrece su bishitantenan.
Segun e prome minister, e entrada pa cada camber disponibel den industria hotelero, conoci como Revenue per Available Room (RevPAR), a aumenta basta den algun aña. Sinembargo, e ta cuestiona con ta posibel cu e industria turistico ta experimenta un crecemento asina grandi, mientras hopi empleado ta sigui depende di un salario minimo. Eman a destaca cu tambe tin empleado den cushina, mantencion y otro funcion cu no ta beneficia di tips. Ademas, un parti di e empleadonan aki ta traha pa contratista en bes di directamente pa un hotel, locual, segun e prome minister, ta contribui na un situacion caminda nan ta ricibi solamente salario minimo. E prome minister a menciona tambe e esfuersonan cu Gobierno ta haci pa mehora e situacion di nos pensionadonan, incluyendo esnan cu durante hopi aña a traha duro den sector hotelero y cu awor ta depende di un pension limita.
Cicilia: Poder di compra di empleadonan a keda atras
Minister Wendrick Cicilia di su banda a indica cu un analisis prepara pa Aruba door di Economisch Bureau Amsterdam (EBA) ta mustra cu salario minimo no a aumenta substancialmente for di 2017, mientras inflacion si a sigui crece. Segun Cicilia, e situacion aki a afecta poder di compra di empleadonan cu ta gana menos, mientras Aruba a experimenta un crecemento economico considerabel. E minister a enfatisa cu e analisis ta basa riba dato academico, scientifico y informacion economico di Aruba, cu e meta di identifica manera pa logra un miho reparticion di prosperidad. Cicilia a cuestiona si ta aceptabel pa Aruba sigui cu un situacion caminda economia ta florece, pero nos famianan cu ta traha no ta logra cubri nan gastonan basico. Segun e minister, Gobierno ta consciente di e deliberacionnan tocante posibel efecto di aumento di salario minimo, pero cu e pregunta fundamental ta si Aruba por sigui tolera cu un parti di su poblacion trahado ta keda atras. Cicilia a indica cu e situacion economico actual di Aruba ta ofrece oportunidad pa interveni y mehora calidad di bida di e grupo aki.
Miles di empleado bou di bestaansminimum
Prome Minister Eman a indica cu, segun e cifranan cu Gobierno ta manejando, alrededor di 22.000 empleado, representando aproximadamente 43% di poblacion trahador, ta gana menos cu e nivel di bestaansminimum. Pa e prome minister, e situacion aki ta un di e motibonan principal pa Gobierno mantene su intencion di aumenta salario minimo. Eman a enfatisa cu Aruba no por aspira pa un economia cu ta crece solamente den cifra, mientras un parti importante di su poblacion no ta experimenta e beneficio den nan bida diario. Segun Eman, e concepto di One Happy Island mester refleha no solamente e experiencia di e turistanan, sino tambe e bienestar di nos hendenan cu ta contribui diariamente na e exito di Aruba.
Hulanda ta sigui desaroyo na Aruba di cerca
E reunion cu lider di fraccion di VVD ta forma parti di e contactonan di Prome Minister Eman cu representantenan politico na Hulanda. E dianan aki, e delegacion a tene un reunion cu lider di CDA, Henri Bontenbal, mientras tin mas encuentro programa pa e siman aki cu otro politico Hulandes. Minister Cicilia a destaca importancia di mantene e relacionnan entre Aruba y Hulanda di cerca, e relacionnan aki ta importante pa sigui fortalece cooperacion den Reino, particularmente den e areanan di desaroyo economico, bienestar social y intercambio di conocemento.
