Prome Minister Mike Eman a reuni cu minister-president di Hulanda Rob Jetten na Den Haag, caminda nan a intercambia idea tocante futuro di Reino, cooperacion entre e paisnan y siguridad den region. Durante e encuentro Prome Minister Eman tabata acompaña pa Minister Plenipotenciario di Aruba na Hulanda, Mildred Schwengle, y Minister di Turismo, Transporte y Labor, Wendrick Cicilia. Esaki ta di tres biaha cu e tin oportunidad di intercambia idea cu minister-president di Hulanda tocante varios tema importante pa Aruba, Hulanda y Reino den su totalidad.
Un di e temanan central tabata e proximo Kingdom Summit cu lo tuma luga dia 17 y 18 di november na Sint Maarten. Durante e encuentro aki, cada pais lo presenta su vision riba e desaroyonan actual, e retonan cu nan ta enfrenta y e posibilidadnan pa mas cooperacion. Prome Minister Eman a splica cu Aruba ta promoviendo un vision nobo di Reino, caminda cooperacion no solamente ta basa riba relacion tradicional, pero tambe riba oportunidad cu ta trece beneficio mutuo pa cada pais. Como ehempel, Eman a menciona e iniciativa pa establece un presencia di Wageningen University & Research (WUR) na Aruba. Esaki por contribui na desaroyo di Aruba y, na mes momento, crea oportunidad pa e instituto Hulandes amplia su actividadnan den region Caribe. Eman a enfatisa cu Aruba no ta wak solamente riba e Reino cu nos a hereda, pero tambe riba con nos por duna e relacion aki un perspectiva nobo pa futuro, caminda cada pais por sinti e balor di forma parti di Reino.
Siguridad y proteccion di Aruba
Otro tema importante durante e reunion tabata e situacion di siguridad den region. Prome Minister Eman a expresa su gradicemento pa e sosten cu Hulanda ta brinda Aruba, particularmente durante momentonan di incertidumbre internacional. Eman a destaca cu cooperacion cu Hulanda ta di gran importancia pa proteccion di integridad teritorial di Aruba y pa mantene relacion internacional fuerte. Tambe a menciona e contacto continuo cu autoridad Hulandes, incluyendo e ministerionan di Defensa y Relacionnan Exterior.
Durante e encuentro, Eman tambe a destaca importancia di e relacionnan politico entre e paisnan di Reino, banda di cooperacion existente na nivel administrativo y tecnico. E contacto aki ta contribui na un miho comprension di e perspectivanan y necesidadnan di cada pais. Prome Minister Eman a califica e reunion como positivo y a reafirma cu Aruba lo sigui inverti den cooperacion strategico cu Hulanda, cu enfasis riba oportunidad cu por beneficia tur pais den Reino.
