Diabierna mainta e hoben J.B. (17) a presenta dilanti Hues pa scucha su sentencia. J.B. ta wordo acusa di a cap e homber H. formal cu machete y di tabatin armanan di candela den su posecion.
SOLO DI PUEBLO por a compronde cu Hues a haya J.B. culpabel di a cap e homber H. cu machete y tambe cu J.B. tabatin armanan di candela. Hues a condena J.B. na 18 luna di prison y bou guia di Reclasering.
Algun siman pasa tratamento di e caso a tuma lugar caminda Fiscal a acusa J.B. di intento di asesinato riba 10 April 2026. J.B., kende e tempo ey tabatin 16 aña, a dal e hoben H. diferente biaha cu machete na cabez, nek, brazanan y pianan. Ademas J.B. ta wordo acusa di posecioin di armanan di candela entre Maart y April 2026. Fiscal a exigi 24 luna di prison y bou guia di Reclasering.
SENTENCIA
Hues a bisa cu pa e acusacion di armanan di candela, esaki ta legalmente proba y cu J.B. a admiti. Pa e caso di capmento cu machete, Hues ta rechaza e ponencia di J.B. cu el a bay defende e dama A., despues cu e homber H. a dal e dama A.
Hues ta haya cu ta J.B. a bay cu A. den un auto na e cas di H. Na opinion di Hues, no por determina ken tabatin e machete den su man ora a dal H. cu esaki. El a mustra cu H. ta bisa cu ta e homber S., cu tabata hunto cu J.B. y A. den e auto, a dal’e. S. ta bisa cu ta J.B. Hues ta haya cu esun cu a dal H. cu machete a tuma e riesgo cu por a mata H. Hues ta haya cu J.B. tambe ta culpabel di e capmento.
CASTIGO
Pa cu e castigo, Hues a bisa cu e ta tene cuenta cu e seriedad di e hecho. El a mustra cu J.B. a purba kita bida di H. y a tacha su integridad. Tambe Hues a tene na cuenta cu J.B. tabatin arma di candela den su poder. Hues a tene cuenta tambe cu Reclasering su raport cu ta papia di castigo combina y supervision.
Hues a condena J.B. na castigo hubenil di 18 luna di prison, di cual 6 luna ta condicion cu 2 aña di prueba. Esaki cu e condicion special cu J.B. ta cay bou guia di Reclasering. Hues a bisa cu J.B. mester coopera cu haci test di droga, mester sigui educacion y haya guia di psycologo.
