E smartphone, tablet, game, e bida online di un mucha of hoben a bira un parti indispensabel di nan bida. Estudionan local y internacional ta mustra cu nos muchanan y hobenan ta pasa hopi ora online. Di un promedio di dos ora, te cu diestres ora pa dia. Internet ta caminda hopi mucha y hoben ta siña, conecta, hunga, expresa nan mes y planea pa futuro. Tambe ta caminda algorithms ta forma locual nan ta mira, caminda nan datonan personal ta wordo uza.
Trinta aña pasa, conectividad digital tabata limita na algun miyon persona rond mundo. Awor, e revolucion digital a expande rond mundo y awe casi cinco biyon persona ta conecta. Den hopi pais, technologia digital a wordo adopta rapidamente pa muchanan. Internet no ta un luho mas pa mucha, pero a bira necesario pa hunga, tene contacto cu amistad y famia, siña y desaroya habilidadnan pa futuro.
Pero e bishita di un mucha y hoben online tin hopi riesgo tambe cu ne. E riesgonan cu mas sa presenta den e bishita di e mucha y hoben online ta: Cyberbullying y Harassment, Technology-Facilitated Child Sexual Exploitation y Abuse, Exposure to harmful content y Mental Health aspects of being online.
Cu e campaña Who is Driving?, 131 Aruba kier concientisa e mayornan y comunidad den su totalidad cu e ta di sumo importancia pa supervisa e bishita y conducta online di nos muchanan y hobenan. E ta importante pa ta conciente cu na e momento cu un mucha/ hoben ta online sin supervision di un adulto, e ta mescos cu como mayor bo a duna bo yiu un yabi di auto y permitie core e auto. E ta importante pa mayornan tuma e stuurwiel den nan man.
Pa cualkier sosten of informacion cu ta regarda e riesgonan y dañonan cu mucha y hoben por topa online, por yama, mail of chat cu 131 Aruba. Espacio online safe ta ser crea pa medio di supervision adecua di mayor.
E campaña Who is Driving? ta un campaña cu lo ta visibel ariba Facebook, Instagram y TikTok di 131 Aruba di 30 di October te cu 30 di December. E campaña Who is Driving? ta ser implementa cu sosten di Child Helpline International pa medio di e projecto Voice Up Online.
Pa mas informacion tocante e campaña Who is Driving? por tuma contacto cu 131 Aruba via nos website: 131.aw, facebook: https://www.facebook.com/aruba.131/, email: 131aruba@gmail.com of telefon 5886138/ 5884011.
