Kico ta nifica arogancia , of un hende arogante segun e Palabra di Dios: Esey ta un persona cu ta sinti su mes mas halto cu otro hende, cu no ta respeta, cu ta kere den cu rikesa of sabiduria of poder, y asina ta sinti su mes independiente, mescos cu e no tin mester di ningun hende.(Isaias 13:11).
Un hende orguyoso segun e Palabra di Dios, ta un persona cu den su mes bista e ta sabi, e ta bon, e ta feliz, no tin respet pa Dios, tampoco tin temor di Dios,e ta kere den su mes y lubida cu e ta creacion di Dios, e no ta haya necesario pa reconoce Dios den su bida,(Romanonan 1:28-32).tur cos ta mustra manera bon, pero su conducta ta hiba na su propio destruccion, pasobra Dios no tin relacion cu e hende orguyoso, pero e stima e hende humilde.( Santiago 4:6 & 1 Pedro 5:5).
Un persona orguyoso y arogante su relacion cu Dios ta kibra.
Y Bijbel ta mustra esey den varios parti di scritura por ehempel:
Aaron y Miriam den Numbernan capitulo 12.
E Fariseo den e tempel Lucas 18:9-14.
Rey Nabucodonosor den buki di Daniel.
Rey Senakerib y Rabsakes den Isaias 37:9-13.
Awendia tin hopi caso di arogancia y orguyo, den politica, den deporte, casnan di Famia,Negoshi,y hasta bao di esnan cu conoce Senjor.
Hende nan cu no kier reconoce otro, cu ta kere cu nan ta grandi, cu ningun otro no por crece, y cu Dios ta funciona pa nan so.
Den bida di tur dia nos ta mira arogancia y orguyo ta funciona bao di hubentud.
Hoben cu no ta respeta su mayornan.
Hoben cu ta sigi haci malo, aunke cuanto bon conseho a wordo duna na dje.
E uso di droga y alcohol sin kier stop pensando cu esey ya bon.
E canamento den gang cu arma, y e tiramento riba otro.
Bao di adultonan e orguyo y arogancia ta manifesta.
E asunto di inmoralidad y adulterio.
E asunto di tin placa pero no ta cria yiu.
E asunto di divorcio y laga muher cu yiu riba caya.
E asunto di kita yiu for di mama of tata.
E asunto di lanta un yiu contra su propio tata of mama.
E asunto di laga un propiedad bay perdi pa un otro no hanje.
E asunto cu aunke tempo a pasa, sigi venga otro, sigi kibra otro.
En general arogancia y orguyo ta un gran mentira cu ta pone hende kere cu nan ta haci algo, trece cambio den nan bida, cambio den nan naturalesa , haci cherche di Dios, y pensa cu nada no ta pasa.
Pesey den Jeremias 49:16 Senjor ta papia cu un pueblo, pero awendia e ta conta pa cada hende, cu ta hunga rol di arogante y orguyoso, Pasobra mayoria hende arogante ta orguyoso.
E ta bisa asina aki: E teror pa bo, y e arogancia di bo curason a ganja bo.
Abo cu ta biba den e holnan di baranca,cu ta ocupa e haltura di e serito.
Maske bo traha bo neishi bo mes , hunto cu esun di aguila.
Lo mi baha bo for di eynan Senjor ta declara.
Maske un hende traha un cas grandi cu muraya halto tur na alarma y camera, pa asina e comete su bagamunderia scondi , Dios si ta mira, y Dios lo regla cuenta cune.
Ora hende ta haci malo, dal auto corre bay, comete crimen y sconde, haci malo y tapa cos. Dios ta mira y Dios lo atende cu nan.
Ningun hende no por sconde /scapa for di e bista di Dios.
Sinceramente, Pastor Marcel Balootje.
