Prome Minister Mike Eman a ricibi Minister di Asuntonan Economico y Clima di Hulanda, Heleen Herbert, awe na Bestuurskantoor. E encuentro ta un continuacion di e combersacionnan cu ambos a tene siman pasa durante e bishita di trabou di Prome Minister Eman na Hulanda.
Durante e reunion, nan a intercambia idea tocante e oportunidadnan economico cu Aruba tin den Reino Hulandes, cu enfasis riba diversificacion economico, innovacion y e posibilidad pa atrae mas empresa y institucion di Hulanda pa Aruba. Prome Minister Eman a expresa cu Aruba kier fortalece su posicion como un pais cu ta ofrece balor strategico pa Reino Hulandes. Segun Eman, ta importante pa na Hulanda, incluyendo den circulonan politico di Den Haag, reconoce e oportunidadnan y balor adicional cu Aruba por ofrece.
Den e contexto aki, Eman a menciona e presencia di Schiphol den maneho di aeropuerto di Aruba, e funcion di Aruba como hub di KLM y e presencia di Wageningen como ehempelnan di cooperacion cu por contribui na desaroyo di Aruba.
Prome Minister Eman a enfatisa cu Aruba kier bira un ehempel di un “new reason why” pa Reino, caminda cooperacion entre Aruba y Hulanda ta crea oportunidad nobo y beneficio mutuo. Di su banda, Minister Heleen Herbert a expresa su satisfaccion di por bishita Aruba personalmente, despues di a tende anteriormente e vision y ambicionnan di Prome Minister Eman. Durante su estadia na Aruba, Herbert lo bishita un organisacion cu ta enfoca riba turismo sostenibel, como tambe e tereno di refineria, caminda tin plannan pa den un futuro trece desaroyo nobo den area.
Ademas, e minister lo reuni cu diferente miembro di Gabinete, Gobernador di Aruba y representantenan di Impact Hub, un iniciativa cu ta stimula innovacion y emprendemento. Herbert a indica cu e ta spera di conoce e desaroyonan di cerca y mira e oportunidadnan cu Aruba tin pa ofrece. E encuentro ta forma parti di e esfuersonan pa fortalece cooperacion economico entre Aruba y Hulanda, stimula innovacion y crea mas oportunidad pa diversificacion di economia Arubano.
