Parlamentario Jennifer Arends-Reyes, presidente di Comision di Turismo di Parlamento, a lamenta cu representantenan di MEP y PPA no a participa den e bishita di awe na Aruba Airport Authority (AAA). Segun Arends-Reyes, niun di e dos fraccionnan a avisa cu nan no lo por a asisti.
E bishita tabatin como meta pa e comision conoce e progreso di e proyecto Gateway 2030 y e preparacionnan pa futuro di e aeropuerto. Durante e encuentro, CEO y ehecutivonan di AAA a presenta e proyecto na e parlamentarionan presente. Despues, e delegacion a bishita e sitio pa mira e trabounan mas di cerca.
“Un aeropuerto moderno y prepara pa futuro ta un parti importante di nos infrastructura. E desaroyonan aki tin impacto riba nos conectividad, turismo y economia. P’esey, Parlamento mester sigui di cerca con e proyecto ta progresa,” Arends-Reyes a declara.
E presidente di e comision a señala cu MEP a pidi cu urgencia pa reuni cu representantenan di sector turistico. Mester tene na cuenta agenda di cada representante y di Parlamento y den e caso aki, AAA a aparta tempo y a prepara un presentacion pa e encuentro.
“Ta lamentabel cu e representantenan di MEP, cu a pidi e encuentronan cu urgencia, no a presenta ni a avisa cu nan no lo por a asisti. E bishita tabata un oportunidad pa haci pregunta directamente na ehecutivonan di AAA tocante e proyecto, nan vision pa futuro di e aeropuerto y su importancia pa turismo di Aruba. Nos mester trata e dialogo cu seriedad y cu respet pa e tempo di tur hende,” Arends-Reyes a expresa.
Arends-Reyes a gradici AAA pa e presentacion y pa duna e comision e oportunidad di mira e avance di Gateway 2030 na e sitio. E Comision di Turismo lo sigui di cerca e progreso di e proyecto y otro desaroyonan di infrastructura cu tin impacto riba turismo na Aruba.
