Partido Patriotico Arubano (PPA) kier expresa su mas sincero gradicimento na tur, cu a contribui na e exitoso rifa, cu a tuma luga dia 30 di october ultimo. E rifa su meta tabata pa recauda fondo, pa continua cu e reconstruccion di nos historico Centro Patriotico na San Nicolas.
Nos ta gradici di curason un y tur cu a sea cumpra number, contribui financieramente, coopera cu e organisacion of di un manera of otro, a mustra nan sosten pa e bunita iniciativa aki. Cada contribucion ta representa hopi mas cu djis un aporte financiero: e ta representa solidaridad, confianza y compromiso cu un proyecto, cu ta forma parti di nos historia y cu ta enfoca riba futuro.
NUMBER GANADOR DI E RIFA – 30 DI OCTOBER
* Prome premio: 7047
* Di dos premio: 0117
* Di tres premio: 2117
Masha masha pabien na tur e ganadornan!
E aña aki PPA ta celebra 77 aña di existencia. Den cuadro di e trayectoria importante aki, e reconstruccion di nos Centro Patriotico ta representa un paso significativo pa conserva nos historia, fortalece nos raisnan y construi un espacio, cu ta na servicio di nos comunidad.
Aunke e Centro Patriotico ta situa na San Nicolas, cual ta un lugar profundamente conecta cu historia y curason di PPA, nos vision ta bay hopi mas leu cu djis un cede di partido. Nos kier pa e centro aki bira un berdadero punto di encuentro pa henter Aruba; un espacio di informacion, orientacion, dialogo, asistencia y sosten, habri pa nos comunidad y na servicio di henter nos pueblo.
E trabounan di reconstruccion ya ta andando y danki na sosten di tanto hende, nos ta sigui avansa pa realisa e meta aki.
E reconstruccion ta sigui y e proyecto aki ta di nos tur. Cada aporte, cada gesto di solidaridad y cada muestra di confianza ta permiti nos ta mas cerca pa finalisa cu nos Centro Patriotico, haciendo esaki un realidad, di cual nos tur por sinti orguyoso y parti di dje.
Un biaha mas, di henter nos curason, masha danki Aruba pa boso sosten y confianza!
Partido Patriotico Arubano (PPA)
77 aña di historia, compromiso y patriotismo. Hunto nos ta construi e espacio, unda nos comunidad ta conecta cu su futuro.
