Den e debate riba e presupuesto, Parlamentario Edgard Vrolijk ta puntra gobierno AVP-Futuro: pa ken e placa di pueblo ta?
Gobierno ta den crisis. Parlamento ta den crisis. Y awor, abo tambe ta den crisis. “E blackout di e dianan aki ta djis un smaak di loke ta bin na januari, ora awa y coriente subi,” Edgard Vrolijk a bisa. “Hopi famia caba no ta yega fin di luna. Mi ta tene miedo cu nan lo mester cuminsa paga bombiyo, pasobra nan no por paga e cuenta mas.”
“Nan ta gasta e placa prome, despues nan ta bin pidi permiso. Y pueblo ta keda cu e recibo.”
Un excepcion pa e grandi
Aruba tin un ley cu ta pone un limite riba salario di e directornan grandi di gobierno. Pero gobierno a haci un excepcion pa e CEO di e aeropuerto, prome cu e ley a cambia. “Pa un director grandi, gobierno ta haci un excepcion prome y ta pidi permiso despues. Pero si abo laga un cuenta habri, ningun hende ta haci un excepcion pa bo,” Vrolijk a bisa.
Placa pa biahe y propaganda
Den e cambio di presupuesto, gobierno ta pidi Afl. 5,5 miyon mas pa su mes gastonan. “Cada florin cu ta bay pa biahe y propaganda, ta un florin cu no ta yega pa alivia bo gastonan na cas.”
Tambe, gobierno ta purba pone su mesun hendenan como director. “Si e trabounan grandi ta bay pa amigo, e hoben cu a bay studia afo no ta bin bek. Pakico e lo bin, si su diploma no ta conta?”
Hechonan, no palabra
“Mi ta orguyoso di ta den MEP. Ora MEP tabata den gobierno di 2001 te 2009, salario minimo a subi casi 40%. Den e ocho añanan di AVP despues, e no a subi ni 11%. Esey ta hecho. Bo por check’e.”
Pueblo ta cansa
“Pueblo ta cansa di mira su placa bay pa biahe, propaganda y amigonan, mientras e mes no por paga su cuentanan. Pueblo merece un gobierno cu ta pone abo y bo cartera prome.”
