Den e debate riba e prome cambio di presupuesto 2026, Parlamentario Rocco Tjon (MEP) a exigi di gobierno AVP-Futuro splicacion riba con e ta distribui placa di pueblo.
Den e sector di salud mental, e lista di espera ta sigui subi. Fundacionnan manera Respaldo y Stichting Hunto tin peticionnan pa personal adicional riba mesa pa lunanan. Mientrastanto, gobierno ta paga un experto di Hulanda Afl. 23.000 pa luna pa traha mita dia, pa skirbi un analisis riba e “gaps” den salud mental cu ta skirbi caba door di profesionalnan local.
“E plannan y e informacion di e stakeholders tabata cla caba. Loke tabata falta ta ehecucion,” Tjon a bisa.
Gobierno ta pone tambe Afl. 500.000 pa personal di un institucion nobo pa adicto. “E minister mes a usa e argumento cu no tin personal cualifica na Aruba pa trece un experto di Hulanda. Pues, ken lo traha den e institucion nobo, y ki consulta a tuma luga cu e stakeholders?”
Cuido den exterior: si, pero cu reglanan cla
E cambio di presupuesto ta subi cuido medico den exterior cu Afl. 850.000. Tjon ta sostene e yudansa aki: pashentnan cu malesa grave, cu no por wordo atendi na Aruba, tin derecho riba nan tratamento. Pero Raad van Advies mes ta constata cu no ta cla pakico e cuido aki no ta bou di AZV. Tjon ta exigi claridad riba con a calcula e suma, ken ta califica y na ki institucion den exterior e placa ta bay.
Onderstand y Husticia
Gobierno ta baha e presupuesto di onderstand cu Afl. 3,3 miyon, pasobra segun gobierno, e ta “bovenmatig”. Den e mesun ministerio, Afl. 1,17 miyon ta bay pa huur expertonan di afo pa evaluacion y estudio. “Den un pais caminda hopi famia no ta yega fin di luna, gobierno mester splica exactamente kico e Afl. 3,3 miyon ta bay financia.”
Pa Husticia, gobierno ta pidi Afl. 2 miyon mas pa “costo mas halto den diferente post”, sin specifica ki post. Esaki despues cu e mesun gobierno a corta 10% riba e presupuesto di Husticia den su prome luna. Suppliers no ta wordo paga, preguntanan na e minister ta keda sin contesta, y un peticion pa un reunion publico riba siguridad no a wordo yama.
“Nan ta gasta e placa prome, despues nan ta bin pidi permiso. Pa e experto di afo, e placa tey caba. Pa e pashent, pa e fundacion y pa e siguridad di nos pais, mester warda”, Tjon a conclui.
