Ban papia di salario digno, contribucion di comercio y atencion pa necesidadnan social
Parlamentario di AVP, Clifford Heyliger, ta boga pa un discusion profundo y responsabel tocante aumento di salario minimo, den cual tanto e capacidad di empresanan como e realidad di trahadonan y e necesidadnan social di Aruba mester wordo considera. Durante e tratamento di e presupuesto suplementario 2026, e ta pone enfasis riba responsabilidad comparti entre gobierno, comercio y comunidad.
“Tin hopi necesidad den nos sociedad. Organisacion tras di organisacion ta trece dilanti cu nan falta recurso y ta pidi mas sosten di Gobierno. Pero si nos ta discuti e impacto di un aumento di salario riba comercio, nos mester puntra tambe cuanto comercio ta contribui anualmente na comunidad y cuanto percentahe esaki ta representa di nan omzet,” Heyliger a expresa.
Pa e parlamentario, e informacion aki por contribui na un discusion mas completo tocante e distribucion di responsabilidad social. E ta reconoce cu empresanan mester por sigui opera, pero ta considera cu nan contribucion na bienestar di comunidad tambe mester forma parti di e evaluacion.
Comercio su papel den comunidad
Heyliger ta recorda cu antes hopi ekipo deportivo tabata carga nomber di comercio cu tabata sostene nan cu uniform, ekipo y otro necesidadnan. E ta uza e ehempel aki pa plantea con e sector comercial ta contribui actualmente na deporte, hubentud y trabou comunitario.
“Tin critica cu Loto pa Deporte no ta contribui suficiente. Ta importante pa evalua esey, pero tambe pa sa con otro sectornan ta contribui. Unda comercio su rol ta? Cuanto e ta duna bek na e comunidad den cual e ta opera?” e parlamentario a cuestiona.
Segun Heyliger, e expectativa cu presupuesto di gobierno mester absorba tur necesidad ta exigi un reflexion mas amplio. E ta enfatisa cu e sosten di organisacionnan y e solucion di problemanan social mester conta cu participacion di diferente sector.
Salario y condicionnan di trabou
Heyliger ta señala cu tin hende cu ta traha cinco of seis dia pa siman, cu exigencianan halto di productividad, mientras nan entrada ainda no ta suficiente pa cubri nan necesidadnan. E ta trece dilanti tambe e realidad di trahadonan cu no ta ricibi bonus of vakantiegeld.
Pa dje, e discusion tocante salario mester inclui e impacto cu insiguridad financiero tin riba famianan y e presion cu esaki por pone riba servicionan social. E ta considera cu prevencion y bienestar mester forma parti di responsabilidad comparti.
“Nos como politiconan tin un responsabilidad pa percura cu e economia ta ofrece hende e posibilidad pa biba bon. Nos sa cu ainda tin famianan cu ta lucha. E discusion aki mester wordo tuma cu seriedad, cu informacion y cu disposicion di tur parti pa contribui,” Heyliger a enfatisa.
E ta señala cu gobierno a absorba parti di e subida di prijs di combustibel pa mitiga costo di bida. Alabes, e ta cuestiona cu oposicion a critica e gabinete AVP/Futuro pa no haci suficiente, mientras awor ta cuestiona e intencion pa subi salario minimo den fase te acerca esaki na bestaansminimum.
