MEP: “E presidente no por sigui nenga un reunion ora cu e reglement van orde ta oblig’e pa yama e reunion”
Fraccion di MEP a insisti awor pa e di dies biaha riba yama un reunion publico di Parlamento pa trata e proposicion di Rijkswet HOFA. E prome peticion ta fecha di 20 di maart 2026. E ultimo, di dies rappèl, a wordo manda dia 5 di november. Te awe, e reunion ainda no a wordo yama.
Pa MEP, esaki no ta un asunto di preferencia politico, sino di respeta e reglanan parlamentario y e responsabilidad democratico di Parlamento. E Reglement van Orde no ta laga espacio pa un escogencia pa e Presidente: ora cu por lo menos tres miembro di Parlamento pidi un reunion, e Presidente ta obliga pa yama e reunion.
Esey ta haci mas remarcabel cu e debate fundamental aki tocante autonomia y futuro financiero di Aruba ainda no a tuma luga den Parlamento.
Durante e bishita di e Comision Permanente di Parlamento Hulandes na Parlamento di Aruba na october 2026, e Comision a enfatisa cu e debate tocante HOFA mester wordo hiba na Aruba mes. Pa e Comision tabata hasta incomprendibel cu un tema di tal magnitud y importancia no ta wordo trata den Parlamento di Aruba.
MEP ta haci un yamada na e Presidente di Parlamento pa tuma su responsabilidad y yama e reunion sin mas tardansa. Un copia di e carta a bay pa Gobernador di Aruba.
Un debate tocante futuro di Aruba ta pertenece den Parlamento di Aruba.
