PPP-UNI ta presenta su directiva nobo y su prioridadnan pa Boneiro

Partido Pueblo Progresivo (PPP-UNI) a presenta su directiva nobo durante un conferencia di prensa. E directiva nobo ta asumi responsabilidad pa dirigi e partido y traha riba un vision politico cu ta pone habitantenan di Boneiro central den tur decision y accion.

Cu e lema “Cada Habitante Prome”, PPP-UNI ta expresa su compromiso cu un liderato responsabel, un gobernacion transparente y un desaroyo cu ta genera oportunidadnan pa tur habitante di Boneiro.

Directiva nobo di PPP-UNI

E directiva nobo ta consisti di e siguiente miembronan:

• Marjolein Finies – Presidente
• Wilbert Pourier – Vicepresidente
• Sedney Marten – Secretario
• Rene Flores – Tesorero
• Enzo Finies – Segundo Secretario
• Tulsie Bissessar – Segundo Tesorero
• Henry George – Comisario

Kico PPP-UNI ta representa?

PPP-UNI ta representa un forma di liderato cu ta pone hende prome cu politica. E partido ta traha basa riba principionan di husticia social, igualdad, transparencia y responsabilidad publico.

E vision di PPP-UNI ta enfoca riba:

• Un gobernacion honesto, transparente y responsabel, cu ta duna cuenta na pueblo.
• Proteccion di derechonan humano, igualdad y husticia social.
• Bibienda accesibel y reduccion di costo di bida.
• Cuido medico moderno y digno, incluyendo pa nos grandinan.
• Enseñansa di calidad, enseñansa superior y formacion tecnico.
• Mas oportunidadnan pa hubentud, trahadornan y empresanan local.
• Stimulacion di regreso di studiantenan y miembronan di nos diaspora.
• Proteccion y promocion di Papiamento, nos identidad y cultura.
• Desaroyo sostenibel y cooperacion internacional.
• Bon gobernacion y fortalecemento di democracia.

Ocho prioridad principal pa Boneiro

PPP-UNI a defini ocho prioridad principal cu ta forma e base di su agenda politico y plan di accion pa futuro di Boneiro.

1. Boneiro riba Lista di Teritorionan No Autonomo di Naciones Unidas

E punto central no ta descolonisacion cu independencia of salida for di Reino Hulandes como meta, sino reconocemento di responsabilidad internacional di Reino Hulandes pa cu pueblo di Boneiro, den cuadro di Carta di Naciones Unidas.

E base huridico ta Capitulo XI di Carta di Naciones Unidas, specialmente Articulo 73 (a, b, e).

Esaki ta inclui:

• Garantisacion di progreso politico, economico, social y educativo.
• Respeto pa cultura y identidad di pueblo.
• Consideracion di aspiracionnan politico di habitantenan.
• Promocion di desaroyo di autogobernacion y institucionnan politico propio.
• Proteccion di interesnan y bienestar di pueblo.

Esaki ta basa riba e principio cu interesnan di habitantenan mester ta primordial.

2. Un hospital nobo y moderno

PPP-UNI ta aboga pa construccion di un hospital nobo, moderno y equipa adecuadamente, na un localidad strategico entre Rincon y Playa.

E hospital mester conta cu un Unidad di Cuido Intensivo (ICU) completo, specialistnan medico cu ta biba y traha tempo completo na Boneiro, facilidadnan moderno pa diagnostico y un oferta amplio di servicio medico specialisa.

E meta ta pa habitantenan tin acceso na cuido medico di calidad, sin depende di biaha pa exterior pa cada necesidad medico.

3. Un universidad, instituto tecnico y scol di hoteleria y industria

Pa habri mas oportunidadnan pa hubentud y poblacion en general, PPP-UNI ta propone desaroyo di enseñansa superior y formacion profesional na Boneiro.

E prioridad aki ta inclui:

• Un universidad cu programanan di estudio na nivel di bachelor.
• Un instituto tecnico cu formacion practico y profesional.
• Un scol di hoteleria specialisa den hospitalidad, turismo, maneho di hotel y industria.

E meta ta pa hubentud por haya oportunidad pa desaroya nan conocemento y capacidadnan na Boneiro, preparando nan pa mercado laboral di awe y di mañan.

4. Desaroya Fontein pa habitantenan di Rincon

PPP-UNI kier duna Fontein un impulso nobo como un centro di desaroyo agricola, cultural y economico, cu atencion special pa habitantenan di Rincon.

E plan ta inclui produccion agricola, preservacion di patrimonio cultural, un parke cultural, un Cushina Criollo y Plaza Fontein.

Asina, Fontein por bira un luga caminda cultura, tradicion, economia local y desaroyo comunitario ta bay man den man.

5. Reforma di enseñansa y proteccion di Papiamento

PPP-UNI ta considera reforma di enseñansa un prioridad. E sistema local di enseñansa secundario mester adapta miho na necesidadnan di studiantenan di Boneiro, tumando na cuenta nan idioma materno como medio pa adquiri conocemento di mundo, identidad, cultura y futuro oportunidadnan riba mercado laboral.

PPP-UNI kier haci uzo di mecanismonan apropiado di Naciones Unidas riba tereno di derechonan humano pa eherce presion riba Hulanda, cu e meta di atende deficiencianan den sistema di enseñansa y sostene reformanan cu ta respeta derechonan linguistico y cultural di Boneiro.

Ademas, PPP-UNI ta exigi cu personal di departamentonan publico y servicionan cu ta atende publico na Boneiro tin capacidad pa comunica efectivamente tambe na Papiamento.

6. Trece nos studiantenan y diaspora bek cas

Studiantenan y profesionalnan Boneriano cu ta biba y traha na exterior ta representa talento y un fuente importante di conocemento pa Boneiro.

PPP-UNI kier reintroduci programanan y incentivonan atractivo pa stimula nan regreso na Boneiro.

Esaki por inclui asistencia pa haya bibienda, oportunidadnan di trabao, colocacion den funcionnan profesional y sosten pa esnan cu kier cuminsa nan propio negoshi.

E meta ta pa Boneiro por beneficia di conocemento, experiencia y capacidadnan cu su propio habitantenan a adquiri na exterior.

7. Un haf y terminal di container pa Boneiro

Cu crecimiento di poblacion y demanda cada bes mas grandi pa producto y servicio, PPP-UNI ta considera importante pa Boneiro fortalece su infrastructura portuario.

E partido ta propone mehoracion di facilidadnan di haf, incluyendo un terminal di container, pa por ricibi mas carga directamente na Boneiro.

E meta ta reduci gastonan di transporte, mehora distribucion di producto y contribui na baha prijsnan pa consumidor, aliviando asina e costo halto di bida.

8. Derechonan constitucional, derechonan humano y cooperacion internacional

PPP-UNI ta compromete pa defende derechonan constitucional di Boneiro, incluyendo su derecho di autodeterminacion.

E partido lo haci uzo di mecanismonan disponibel di Naciones Unidas, particularmente esnan relaciona cu Derecho na Desaroyo y Comite pa Derechonan Economico, Social y Cultural (CESCR).

E enfoque lo ta riba atende desigualdadnan den desaroyo y infrastructura, combati pobresa, reduci costo di bida, promove bibienda accesibel, garantisa condicionnan di trabao husto y stimula oportunidadnan economico.

Na mes momento, PPP-UNI ta pone enfasis riba proteccion di cultura, tera y medio ambiente, pa garantisa un desaroyo equitativo y sostenibel cu ta beneficia tur habitante di Boneiro.

Cada Habitante Prome: un compromiso cu futuro di Boneiro

Pa PPP-UNI, e prioridadnan aki no ta solamente un lista di ambicion, sino e base di un agenda politico cu ta dirigi riba resultadonan concreto pa comunidad.

E partido ta considera cu Boneiro merece un futuro cu mas husticia social, mas oportunidad, miho servicio publico y un desaroyo cu ta respeta identidad, idioma y derechonan di pueblo.

PPP-UNI ta invita tur habitante, organisacion, sector empresarial y representantenan social pa contribui na debate y na desaroyo di un Boneiro mas husto, fuerte y sostenibel.