Parlamentario ta haci un yamada pa mas atencion, proteccion y participacion di nos muchanan.
Durante luna di november, atencion internacional ta bolbe concentra riba derecho di mucha. Dia 20 di november ta marca Dia Mundial di Mucha, un fecha cu ta conmemora e adopcion di e Convencion di Nacionnan Uni tocante Derecho di Mucha, na aña 1989.
E fecha aki ta un oportunidad pa recorda nos mes cu cada mucha, sin importa su origen, situacion familiar, condicion economico of capacidad, tin derecho na proteccion, educacion, salud, desaroyo, recreacion y un bida digno. Pero, mas cu un conmemoracion, e fecha aki mester sirbi como un momento pa evalua cuanto nos ta haci realmente pa garantisa e derechonan aki den bida diario.
Derecho di mucha ta mas cu un declaracion
Parlamentario Shailiny Tromp-Lee ta enfatisa cu derecho di mucha no ta solamente responsabilidad di mayornan. Ta un responsabilidad comparti entre famia, scol, comunidad, organisacionnan y gobierno.
“Nos muchanan no ta solamente e futuro di Aruba, nan ta parti di nos sociedad di awe. Nos tin e deber pa crea un ambiente unda nan por crece cu amor, proteccion, siguridad y oportunidad. No ta suficiente pa bisa cu nos ta stima nos muchanan. Nos mester mustra esaki den nos decisionnan, nos actitud y nos accionnan.”
Segun Tromp-Lee, tin varios aspecto di derecho di mucha cu merece atencion continuo. Entre nan ta e derecho pa crece den un ambiente liber di violencia, abuso, maltrato y negligencia, e derecho na educacion y cuido di salud, y e derecho pa wordo trata cu dignidad y sin discriminacion.
E bos di un mucha: nos ta scucha nan?
Un aspecto cu merece atencion special ta e derecho di mucha pa expresa nan opinion y pa wordo scucha.
“Cuanto biaha nos ta bisa un mucha cu e ta chikito ainda, cu e no ta compronde, of cu e mester keda keto? Scucha un mucha no ta nifica cu nos mester duna nan tur loke nan pidi. Ta nifica cu nos ta duna nan espacio pa expresa nan mes, cu nos ta tuma nan sentimento na serio y cu nos ta considera nan opinion di acuerdo cu nan edad y madurez.”
Pa e Parlamentario, un sociedad cu ta proteha su muchanan mester por scucha nan tambe. Un mucha cu ta sinti cu su bos ta conta por desaroya mas confiansa pa expresa su preocupacion y busca yudansa ora e tin mester. Scucha pero percura pa reacciona y of actua, asina nos ta crea e confiansa.
Proteccion di mucha ta un responsabilidad di tur nos
Tromp-Lee ta indica cu e proteccion di mucha no por keda solamente den palabranan of den actividadnan special. E mester bira parti di nos manera di actua tur dia. Esaki ta inclui reconoce señalnan di maltrato, abuso, intimidacion of negligencia. Tambe nos mester tuma preocupacionnan di mucha na serio y percura pa tin un persona of caminda sigur unda un mucha por pidi y haya yudansa.
Tambe ta importante pa gobierno y tur instancia responsabel sigui evalua si e maneho, servicio y recursonan disponibel ta cumpli cu e necesidadnan real di muchanan y nan famianan.
“Nos mester haci mas cu papia di derecho di mucha. Nos mester garantisa cu e derechonan aki ta wordo respeta y cu ora un mucha tin mester di proteccion, tin un sistema cu ta scucha, actua y duna atencion continuo.”
Durante luna di november, Tromp-Lee lo dedica atencion special na diferente aspecto di derecho di mucha, cu e obhetivo pa informa, crea consciencia y invita famia, docente, comunidad y autoridadnan pa reflexiona riba e responsabilidad comparti aki.
Pasobra cada mucha merece wordo scucha, proteha y duna oportunidad pa desaroya su potencial. Y e responsabilidad pa garantisa esaki ta di nos tur.
