Awendia tur caminda ta wordo papia, conferencia ta wordo duna, workshops ta tuma lugar y tur cu e topico di Salud Mental como base, pero hopi hende no ta tene cuenta cuanto danjo Envidia y Jaloers por haci na mente y curason di hende.
No laga nos lubida cu despues di caida di Adam y Eva, Jaloezie a causa e prome crimen.( Genesis 4:3-8).
Awor ta bon pa tur hende sa ki ora bo ta core riesgo cu Envidia y Jaloezie por haci danjo na bo salud mental, pasobra esey ta sosode poco, poco mescos cu e ladron ta bini pa horta, pa mata y pa destrui.
(Juan 10:10).
Na prome lugar e ta kita pas for di bo curason,y tambe kita bo pas mental. ( Proverbionan 14:30).
Envidia ta pone bo rabia,sinti duele,y hasta preocupa ora bo mira un otro ta crece.
Envidia ta duna bo stress y depresion, pone bo papia malo.
Envidia ta pone cu bo no kier reconoce e trabao di un persona.
Envidia ta pone cu bo ta minimalisa hende.
Envidia ta pone cu bo ta papia tras di su lomba.
Envidia ta pone cu bo ta aparta , cual ta demostra bo amargura.
Envidia ta pone cu bo ta pensa cu nunca e persona ey lo bira algo den bida, pasobra abo kier pa e keda depende di bo.
Envidia ta pone cu hende ta desea otro malo, sin cu nada a pasa.
Envidia ta pone hende bisa cu nan sanger no ta bay bon cu cierto persona.
Den tur e puntonan aki nos ta mira cu mente di hende ta cunuco di envidia, y esey no ta bini di Dios, pero ora nos permiti diabel sembra maldad den nos curason , e ta alcansa nos mente y asina nos salud mental ta wordo afecta.( No lubida cuanto rey Saul a envidia David, y e consecuencia mental pa rey Saul).
Jaloezie ta pone cu hende kier rebaha otro.
Jaloezie ta pone cu hende ta busca respaldo di otro hende jaloers, pa asina logra nan meta.
Jaloezie ta traha tanto spiritual como carnal.
Jaloezie ta pone hende kibra amistad cu otro sin motibo.
Jaloezie ta pone hende provoca otro.
Jaloezie ta pone hende haci manera nan ta cu bo, pero nan curason no ta cu bo.
Un hende jaloers semper ta purba di trece competencia, semper lo trata di forsa algo.
Envidia y Jaloezie hunto ta bira un pakete completo cu ta causa morto spiritual, pasobra caminda tin Envidia y Jaloezie tin tur sorto di cos malo.( Santiago 3:16).
Hopi biaha hende por mescla envidia y jaloezie y kere cu asina nan tin sabiduria, pero e sabiduria cu ta bini di Dios, ta puro, berdadero y no ta haci danjo na ningun hende.
Cuanto hoben no ta bringa y hasta yega na mata otro pa motibo di Jaloezie y despues nan ta ripara cu ta tempo perdi, pasobra awor cu nan tin cu sinta hopi anja den prison e chick no ta warda y ta bay cu otro hende.
Bo tabata sa cu ta pa motibo di envidia nan a entrega Hesus Cristo?( Mateo 27:18).
1 Corintionan 3:3 Pasobra ainda boso ta carnal, pasobra como ta existi, envidia, pleito,y division entre boso,no ta carnal boso ta, y no ta manera tur hende boso ta cana?
Nos salud mental ta algo hopi delicado, y den un palabra bisa e enemigo ta jaag tras di nos (1Pedro 5:8),
Sea cu sano huicio y sobrio cu e proposito di por haci oracion, riba tur cos keda ferviente den boso amor pa otro.
Dios tin tur cos pa bo,
Sinceramente, Pastor Marcel Balootje.





