Parlamentario di AVP Clifford Heyliger, ta pidi pa e debate tocante salario minimo y bestaansminimum basa su mes for di un pregunta concreto: cuanto un persona mester gana pa cubri su gastonan basico y participa dignamente den comunidad? Segun Heyliger, e responsabilidad di gobierno, comercio y parlamento ta pa busca hunto un solucion pa trahadonan cu, aunke nan ta traha tempo completo, mester di dos of tres trabou pa yega na fin di luna.
A tuma nota cu gremio y sindicato ta uza hopi e palabra ‘responsabel’, pero kico esey ta nifica? “Ta responsabel pa acepta cu un persona ta gana un salario minimo cu e no por biba di dje? Despues di cumpra cuminda, paga huur y paga transporte, no ta resta nada. Ainda e no a cumpra nada pa su yiunan. E por ta e miho trahado cu tin, pero toch e mester biba cu un margen hopi preta. Esey ta loke nos mester atende,” Heyliger a expresa.
Entrada digno
Heyliger a referi na e argumento di Camara di Comercio (KvK) y otro representantenan di comercio cu bestaansminimum ta calcula a base di e composicion di un hogar, mientras salario minimo ta aplica na cada trahado individual. E parlamentario ta reconoce cu dos persona cu ta comparti un hogar, por comparti gastonan tambe. Alabes, e ta cuestiona si e ehempel di un pareha caminda un persona ta gana 6.000 florin y e otro ta gana salario minimo ta refleha e realidad di esnan cu mester sostene un hogar cu un solo entrada.
“Ora e pareha separa, con ta keda esun cu ta gana salario minimo? Con ta keda e mamanan soltero cu mester mantene nan yiunan cu un solo entrada? Nos mester papia di con pa duna cada trahado mas independencia economico y di loke ta un nivel digno pa biba na Aruba,” Heyliger a indica.
Pa e parlamentario, bestaansminimum ta e montante necesario pa cubri gastonan esencial y por participa den bida social di comunidad. E ta destaca cu e nivel ey mester refleha e costo di bida y e realidad di Aruba.
Inflacion y presion
Riba invitacion di Heyliger, den su capacidad como presidente di Comision di Labor, Centraal Bureau voor de Statistiek (CBS) a presenta na parlamento con ta calcula inflacion y cua categorianan di gasto ta forma parti di e calculo. E parlamentario a señala cu, den e canasta cu CBS ta uza pa midi inflacion, cuminda y bebida no alcoholico tin un peso di alrededor di 11%, mientras vivienda y servicionan publico tin un peso di alrededor di 25%.
Heyliger a indica cu, aunke salario minimo ta ser ahusta anualmente segun inflacion, ta importante pa mira con aumento den gastonan esencial ta afecta e presupuesto di un hogar. Ora cuminda, vivienda of servicionan publico bira mas caro, un hogar cu ya ta biba cu un margen limita tin tiki espacio pa absorbe e aumento.
Responsabilidad comparti
Heyliger a invita sector comercial pa bin cu proposicionnan concreto den e debate. Segun e parlamentario, Aruba mester prepara su economia pa e cambionan cu ta bin y alabes atende e situacion di trahadonan cu no por cubri nan gastonan basico cu un solo salario.
“Nos no por sigui acepta e situacion actual como normal y despues laga henter e responsabilidad riba gobierno. Pueblo ta pidi nos pa actua. Gobierno, comercio y Parlamento mester haci esaki hunto,” Heyliger a conclui.





