Minister di Relacionnan den Reino, Educacion, Hubentud, Innovacion y Deporte, y Vice Prome Minister di Aruba, sra. mr. Gerlien Croes, a participa na e Vierlandenoverleg (M4LO), un reunion ministerial entre Aruba, Corsou, Sint Maarten y Hulanda, cu a tuma luga dia 17 y 18 di november 2026 na Sint Maarten, simultaneamente cu e prome Kingdom Summit.

Dia 17 di November a tuma luga un reunion general entre e Ministernan di Educacion di Corsou, St. Maarten y Aruba y representante di Minister di Hulanda caminda a dialoga tocante diferente prioridadnan educativo y a reafirma nan compromiso pa fortalece cooperacion, promove intercambio di conocemento y crea mas oportunidad pa studiantenan y educadornan den Reino.

Diaranson 18 di november, Minister Gerlien Croes, hunto cu su tres coleganan di Corsou, Sint Maarten y Hulanda, a formalisa e acuerdonan alcansa mediante firma di e conclusionnan final (slotconclusies) relaciona cu Educacion, Cultura y Ciencia. E documento aki ta establece e prioridadnan y areanan di cooperacion cu e cuatro paisnan a compromete nan mes pa sigui traha riba dje.

Strategic Education Alliance y Brain Gain

Un di e topiconan central durante e reunion tabata e continuacion di Strategic Education Alliance (SEA), un programa di cooperacion cu ta enfoca riba mehoramento di exito academico di studiantenan Caribeño y fortalecemento di e conexion entre educacion y necesidadnan di mercado laboral.

E cuatro Ministernan a acorda pa extende e programa SEA inicialmente te cu 2028, cu posibilidad di un extension adicional te cu 2029, si esaki resulta necesario pa consolida e resultadonan alcansa y garantisa continuidad di e programa.

Adicionalmente, a aproba e prioridadnan di Brain Gain 2027–2030, cu ta enfoca riba fortalecemento di oportunidadnan pa talento Caribeño y e importancia di crea condicionnan cu ta stimula desaroyo profesional y contribucion di nos talentonan na e region.

Pa Aruba, e cooperacion aki ta di gran importancia, considerando e necesidad di prepara nos studiantenan pa nan futuro academico y profesional, mientras cu ta sigui explora oportunidadnan pa conecta talento y conocemento cu e necesidadnan di desaroyo di nos pais.

Multilingualismo y uzo di aparato digital den enseñansa

Durante e encuentro, e Ministernan a dialoga tambe tocante multilingualismo den educacion y e maneho relaciona cu uzo di smartphone y otro aparato digital personal door di studiantenan den ambiente escolar.

E cuatro paisnan a acorda pa sigui intercambia experencianan, conocemento y bon practicanan den e areanan aki, cu e meta di identifica posibilidadnan pa fortalece calidad di enseñansa y adapta e sistemanan educativo na e realidad y retonan actual.

E intercambio aki ta particularmente relevante pa Aruba, unda multilingualismo ta forma parti esencial di nos realidad educativo y unda modernisacion di enseñansa y desaroyo di habilidadnan digital ta prioridadnan importante.

Exploracion di compranan conhunto pa recursonan educativo digital

Un otro tema importante tabata e posibilidad di establece un mecanismo di compranan conhunto (pooled procurement) pa e sector educativo den Caribe Hulandes.

Na iniciativa di Sint Maarten, representante di United Nations Office for Project Services (UNOPS) a brinda un presentacion tocante e beneficionan potencial di un sistema di compranan conhunto.

E mecanismo aki por brinda e paisnan participante oportunidad pa combina nan necesidadnan di compra, fortalece nan posicion den negociacionnan y logra mas eficiencia den gastonan relaciona cu material educativo (digital), tecnologia y otro recursonan esencial pa enseñansa.

E Ministernan a acorda pa sigui explora e posibilidad aki, cu e meta di identifica con cooperacion regional por contribui na un miho uzo di recursonan disponibel.

Cooperacion cultural den Reino

Banda di e topiconan educativo, e cuatro paisnan a reafirma tambe nan compromiso pa continua cooperacion den e area di cultura.

Entre e temanan discuti tabata patrimonio cultural intangibel, educacion cultural, financiamento pa cultura, coleccionnan colonial y arqueologia submarino.

E Ministernan a acorda pa explora posibilidadnan pa mehora coordinacion entre e iniciativanan cultural existente y fortalece e cooperacion den e areanan aki.

Participacion historico di Boneiro, Saba y Sint Eustatius

Un aspecto significativo tabata cu, pa prome biaha, representantenan di Boneiro, Saba y Sint Eustatius (Statia) a participa como observador (toehoorder) durante e combersacionnan di e prome dia, 17 di november.

E participacion aki ta representa un desaroyo positivo den e dialogo educativo den Reino, brindando oportunidad pa e tres islanan Caribeño participa como observador den e intercambio di informacion y conocemento tocante retonan y oportunidadnan comparti.

E presencia di e tres islanan ta contribui na un perspectiva mas amplio riba cooperacion educativo den Reino Hulandes.

Minister Croes: Cooperacion mester traduci den oportunidadnan concreto

Pa Minister Gerlien Croes, e acuerdonan alcansa durante e Vierlandenoverleg ta representa un paso importante den e compromiso comparti pa fortalece educacion den Reino, mientras cu ta respeta e realidad, prioridadnan y necesidadnan particular di cada pais.

“Nos ta comparti hopi retonan den educacion, pero tambe hopi oportunidadnan pa siña di otro y traha hunto. Pa Aruba, ta importante cu e cooperacion aki no keda solamente na intercambio di ideanan, sino cu e ta traduci den accionnan y oportunidadnan concreto pa nos studiantenan y educadornan. Door di uni conocemento, experencia y recursonan, nos por sigui fortalece calidad di enseñansa y prepara nos hobennan miho pa nan futuro,” Minister Gerlien Croes a expresa.

Minister Gerlien Croes a destaca tambe e importancia di e acuerdonan relaciona cu Strategic Education Alliance y Brain Gain, considerando cu exito academico, desaroyo di talento y e conexion entre educacion y mercado laboral ta elementonan fundamental pa progreso sostenibel di Aruba.

E encuentro a marca tambe e finalisacion di e presidencia di Sint Maarten di e Vierlandenoverleg, cu Minister di Educacion, Cultura, Hubentud y Deporte di Sint Maarten, sra. Melissa Gumbs, a transferi oficialmente na Hulanda, cu lo presidi e siguiente encuentro ministerial.

E cuatro ministerionan lo sigui coordina e accionnan necesario pa duna siguimento na e prioridadnan acorda, mientras cu progreso lo wordo evalua mediante e estructuranan existente di M4LO.

Minister Gerlien Croes a expresa su aprecio na Gobierno di Sint Maarten pa e organisacion y hospitalidad, como tambe na tur e delegacionnan participante pa nan compromiso y contribucion constructivo durante e reunionnan.

Cu e formalisacion di e acuerdonan aki, Gobierno di Aruba, via Ministerio di Educacion, ta reafirma su compromiso pa sigui fortalece cooperacion educativo den Reino Hulandes, promoviendo intercambio di conocemento, innovacion y oportunidadnan cu ta contribui na desaroyo di nos studiantenan y educadornan.

Hunto nos ta sigui construi un enseñansa mas fuerte y un miho futuro educacional pa nos hubentud y pa e generacionnan venidero.