Raad van Advies: In memoriam ing. Arsenio (Chenco) Yarzagaray

Sr.ing. Arsenio Yarzagaraya drenta Raad van Advies (Conseho Legislativo) como miembro di e conseho aki.
Ami, como secretaris, a bira masha contento, pasobra Raad van Advies tabata ricibi varios proyecto di ley
cu tabata encera ehecucion di un proyecto. Pa considera si a tene cuenta cu tur e rekisitonan di e ley di
contabilidad, Raad van Advies tabata pidi un ‘haalbaarheid studie’ of ‘feasability study’, manera e ta ser
yama na ingles. E estudio aki mester splica cuanto e proyecto ta bay costa land Aruba y cuanto aňa e lo
tuma land Aruba pa pag’e. Ehempel di esaki ta e asina yama Private Public Proyects of den boca di pueblo
yama PPP-proyecto. Esnan cu kier a protesta contra e proyectonan aki tabata yama nan “Pa Pueblo Paga”.
E proyectonan aki tin nan banda bon y nan banda malo. E banda malo ta cu como e ta tuma hopi aňa pa
paga (25 of 30 aña), na final di cuenta e ta costa land Aruba hopi placa.
Ora Raad van Advies tabata haya un proyecto asina mi tabata sinta lesa tur cos den un solo biaha pa tin un
impresion di e proyecto pa despues studia e feasibility study. Mi tabata yama sr. Chenco na telefoon pa
record’e check e feasibility study pa nos ta sigur cu Raad van Advies no ta manda un conseho robes. Un
biaha Raad van Advies a haya un proyecto cu su feasability study no tabata cuadra. Dos dia prome cu
reunion mi a yama sr. Chenco y mi a pidie pa e studia e proyecto ey bon. Mes ora el a puntra mi: “tin cos cu
no ta cuadra,berdad?” Mi a contest’e: “mi kier ta sigur di e conseho cu mi mester duna”. El a contesta mi:
“okay, mi ta yamabo bek”. Tabata pasa di 10 or di anochi ora el a yama mi: “sra.Marval, ta ken a traha e
cos aki? Nos no por skirbi un conseho positivo. E ta yen di fout. Riba dje cu mi no ta gusta e proyectonan
aki. Nan ta sali nos pueblo hopi placa. Miho nan parti e proyecto den varios parti y pone nos propio
contratistanan local traha riba e proyecto aki. Di e manera ey, nos propio hende tin trabou”. Mi tabata
completamente di acuerdo cu sr. Chenco. Despues el a puntra mi cu tono serio: “pero si abo mes a
descubri e erornan, dicon bo ta pidi mi pa ami controla esaki?”. “Sr. Chenco, abo ta un ingenieur. Bo por
uza ‘wiskundige formules’ y ami ta uza mi reken machientje simpel y barata”. El a contestami: “ami no ta
kere esey”. Mi a contest’e: okay, dia di reunion lo mi lo trece mi rekenmachientje pa bo wak”. Y asina mi a
haci. Ora el a wak mi rekenmachientje di plastic color crème, el a dobla di harimento. “bo mester cumpra
un mas sofistica” y mi a contest’e:” mi ta un juffrouw di scol na prome luga. Mi sa optellen, aftrekken,
delen en vermenigvuldigen. Esey ta suficiente pa mi saca mi som”. El a hari y sacudi cabes.
Sr.Chenco, bo subrina Sharissa sa cu mi tabatin hopi gana di bishita bo pa nos conbersa un poco, pero covid
no a permiti mi cumpli cu e deseo aki. Na henter bo famia mi ta extende mi sincero condolencia. Danki pa
bo bon trabou pa nos isla stima. Danki pa bo ayudo y conocemento. Mi lo carga bo memoria den mi mente
y den mi curason. Mi sa cu Papa Dios tin un lugar bunita reserva pa bo. Sosega na paz. Namaste.

Mr. Alida (Lily) Rasmijn-Marval
Oud-secretaris Raad van Advies