Partido MEP:
Ta parse manera cu Parlamentario Ryçond do Nacimento tin un problema personal contra Premier Wever Croes y hefe di Censo señora Sharin Luydens. E forma con señor Do Nacimento ta keda lansa atake contra e dos damanan aki, no por wordo splica na ningun otro forma. Ta parse cu no tin problema den e pais aki of no tin issues pa e como Parlamentario atende.
Un ex empleado di Censo a horta 68 mil florin y mesora Gobierno y Censo a tuma paso contra dje y a retir’e corectamente. Esaki ta e base di integridad cu nos partido ta traha riba dje. Algo cu indudablemente, señor Do Nacimento no conoce of no a reconoce den e partido cu e ta sostene, siendo un partido cu ta pasa pa historia como e partido di mas corupto di nos pais.
Partido MEP ta conseha Ryçond pa sinta, relax y haci su mes preguntanan serio. Ryçond mester puntra su mes ta KEN a tuma e personal den servicio?
Rycond mester puntra su mes si su lider Mike Eman, tempo cu e tabata minister encarga cu Censo, a permiti Censo bringa corupcion?
Rycond mester puntra su mes cuanto biaha gobierno di Mike Eman a mete directamente den Censo y den otro departamentonan.
Ta bon pa Ryçond sa cu e tempo ey bou gobierno di AVP, ningun hefe di departamento por a papia di e palabra ‘integridad’. Pa Mike Eman y su gobierno, esey tabata un palabra malo cu te hasta nan tin fobia pa mencione. Mike Eman y AVP ta mas asiocia cu e palabra corupcion.
Gabinete Wever-Croes a bin pa caba cu corupcion. Awor cu a para corupcion na Censo, tampoco no ta bon.
Partido MEP ta puntra señor Do Nacimento: “Rycond, kico bo kier anto?”
