Segun AZV: Entotal AZV a haci 447.8 miyon florin na gasto
Director di AZV, Sr. Edwin Jacobs a informa diahuebs mainta riba e rapport financiero di AZV cu a keda cla y cu a wordo entrega. Siman pasa a entrega e rapport na minister di salud Publico, Sr. Oduber.
Despues di e reuda di prensa, lo duna tambe un presentacion na e comision fiho di parlamento encarga cu Salud Publico.
Pa aña 2021, cantidad di asegurado a reduci, compara cu 2020.
Loke ta remarca ta e hecho cu pa 2021, casi 17% di aseguradonan ta riba 65 aña.
E gastonan di 2021, por constata un bahada leve. Na 2021 e gastonan a totalisa 447.8 miyon, siendo cu na 2020 tabata 448.9 miyon, pues un reduccion di 1.1 miyon florin. Un parti ta debi na e recorte cu a wordo haci den cuadro di e plan di “five wave model”. E reduccion ta minimo!
E gastonan promedio di cuido pa asegurado, di 3463 na 2012, pa 4195 florin, pa cada asegurado. Pues, e gastonan pro medio di cuido pa asegurado ta keda aumenta den futuro.
Na entrada, na aña 2019, e fondo a ricibi 263.6 miyon na entrada di prima, dor di Covid el’a bay na 222.6 miyon, y na 2021 el’a recupera y subi bek na 243.6 miyon.
E impuesto asigna pa AZV, ta mira un crecimento fuerte, di 186.9 na 2022, compara cu 144.6 na 2020.
AZV ta kere cu ainda por tin mas oportunidad pa haya mas placa pa BAZV y den cuadro di esey mes a cuminza un campanja di “pidi bo recibo”.
Contribucion di Gobierno:
Na 2019 Gobierno no mester a duna ningun florin. Na 2020 Gobierno mester a hinca 99.7 miyon florin. Y na 2021 Gobierno mester hinca 33.9 miyon. A premira na inicio 56 miyon, pero dor di crecimento acelera, e contribucion di pais a keda limita na 33.9 miyon florin.
