Esun cu ta pretende y kier defende ainda e contracto di maneho di 2011 entre Fundacion Lotto pa Deporte y CBN bisando cu e ta ‘bon’ pa deporte ta un mentiroso o un ignorante. Pakiko?
Pasobra tin tres diferente raport di experto traha na 2015, entre otro door di un profesor di derecho y corporate governance, cu ta demostra (evidencia) bon cla cu e contracto di 2011 no ta uno bentahoso pa Fundacion Lotto pa Deporte.
E contracto 2011 aki no ta incluyi tampoco ningun pero ningun placa pa mantencion di e diferente complehonan deportivonan cu ta propiedad di Lotto pa Deporte. Esaki ta algo insolito, pasobra awor aki ta Gobierno di Aruba cu recurso schaars ta subsidiando cu placa di impuesto e mantencion di e facilidadnan aki por medio di e Fundacion Facilidadnan Deportivo (FFD).
Es decir cu Lotto mes no ta ta duna ningun aporte financiero pa mantencion di su propio facilidadnan deportivo. Pa colmo e mesun contracto 2011 aki no tin placa tampoco reserva pa por paga bek e fiansa 2009 di Afl. 17 miyon na Gobierno di Aruba pa construcion di 3 compleho deportivonan traha na e bario di Santa Cruz, Pos Chiquito y Savaneta.
Basa riba e contracto 2011 finansieramente Lotto pa Deporte tin cu paga un fee (comision) hopi halto di casi 25% (¼ parti) di e benta bruto di loteria y catochi na CBN/CBNA. Es decir cu CBN ta cobra riba e cifra bruto prome cu kita BBO, comision di rebendedor y premio paga. CBN ta haciendo uso pornada di e licencia di Lotto pa Deporte pa haci negoci di loteria y catochi.
Claro e fee no ta ganashi pa CBN, pero si cash flow (placa bruto) cu ta bini disponibel pa CBN por usa manera e ta desea. Di otro banda mester keep in mind cu ora e compañia joew di CBN, esta CBNA na Aruba, ta manda placa pa CBN na Canada ta divisas di Aruba ta wordo exporta.
Pa pone cherry riba e bolo ex Minister Schwengle a manda un carta pisa na 2016 pa board di Lotto pa Deporte cu diferente preguntanan relaciona cu e contracto di 2011.
Kiko a sosode cu e carta serio aki?
Personanan cu ta contra pa Lotto pa Deporte tuma bek e operacion diario (maneho) di loteria y catochi na Aruba, hamas por tin nos deportistanan na curason. Bo mester ta anti-deporte y anti-Aruba. Ta bon conoci cu bou maneho parotin di Tuitt e fundacion Lotto pa Deporte, lanta pa financia deporte, a crea debenan miyonario na Stichting Sportsubsidie Aruba (SSA).
Por lesa esaki den e propio jaarrekeningnan di Lotto. Ta obvio cu Tuitt su maneho a crea pobresa deportivo den SSA y federacionnan na Aruba.
E unico conclusion ta cu awor aki Lotto pa Deporte no ta cumpliendo manera mester ta cu e encargo di subsidia deporte. Por hasta bisa cu Lotto pa Deporte no ta cumpliendo na un manera responsabel cu su mision di statuto, pa cual a lanta e fundacion, esta pa subsidia deporte por medio di benta di loteria y catochi. Ta ora pa deporte haya realmente su ‘fair share’.
