Hopi biaha nos ta tende hende ta bisa, si Dios ta cu nos, ken contra nos, esey ta un palabra hopi grandi, cu por wordo usa ora nos ta compronde berdaderamente kico Dios a haci pa nos.
Den e tempo cu nos ta biba ta para scirbi cu hende lo no kier scucha mas e palabra di Dios, y nan lo sigi esnan cu papia locual nan kier tende,cosnan den cual no tin seriedad,ni tampoco moralidad, pero mas bien pa mantene nan contento pa un rato.( 1 Timoteo 4:3+4).
Pero den Romanonan 8: 32 palabra di Dios ta bisa; Esun cu no a spaar ni Su mes Yiu , ma a entrega E pa nos tur,lo E no duna nos tur, tur cos hunto cun’E.
Den e palabra aki nos ta compronde kico e amor di Dios ta pa nos , cu nos tin oro den nos man y nos ta kita nos bista for di riba Dios, y ta cana cu cara abao buscando kico e mundo por ofrece nos.
Pasobra Dios ta bisa y priminti den su palabra cu esun cu kere lo ta salba, y esun cu no kere lo ta condena.(Juan 3:16) Y Dios ta confirma esey na nos bisando den Romanos 8:31: Pesey awor no tin condenacion pa esnan cu ta den Cristo Hesus.
Awor ta tempo pa nos balora locual cu nos tin y si nos no tin E ainda, ta tempo pa busca Cristo urgente den nos bida, pasobra E ta e unico cu por salba nos for di condenacion eterno of mihor bisa esun cu por libra nos di pasa bida eterna den fierno.
No ta tempo pa haci wega , no tempo pa duna promesa falso, nos ta bibando den un tempo critico, caminda nos tin di purba tur manera pa saca tur hende for di tur creencia falso, y trece nan riba e caminda di berdad y bida cual ta Cristo Hesus.
1 Timoteo 2:5+6 ta bisa : Pasobra ta un Dios so tin ,y un mediador tambe entre Dios y hende, e hende Cristo Hesus. Kende a duna Su mes como preis di rescate pa tur hende.
Corda bon ta para scirbi cu ta un mediador so tin. Pasobra ta un caminda so tin pa yega serca Dios.( Juan 14:6).
E deseo di Dios ta pa tur hende wordo salba, y yega na conocemento di e berdad.
Ma Dios ta demostra Su amor den esaki, cu tempo nos tabata pecado ainda, Cristo a muri pa nos.
(Romanonan 5;8).
Nos no por haci wega cu un amor asina grandi, ni tampoco por chercha, of haci bofon di esaki, pasobra e consecuencia lo ta pa nos mes.
Entregando nos bida na Cristo Hesus nos a scapa for di corupcion di mundo y candela di fierno.
Grandi ta Dios su amor y misericordia, cu E a duna na nos tur e oportunidad igual pa scohe locual ta bon pa nos of permanece den scuridad.
No laga ningun hende gañabo, den e bida aki tin dos caminda, sea bo ta scohe caminda di Dios, of bo ta scohe caminda di scuridad, no tin caminda neutral,no ta existi e caminda mey mey, cu bo por gosa den tur dos pasobra bo ta bay keda decepciona.
Si awe bo ta lesando e mensahe aki , no haci bo curazon duro, tampoco pospone bo salbacion, y sigi laga bo bida corre peliger,pasobra nos tur sa cu binida di Cristo Hesus ta serca.
Cristo Hesus ta para na e porta di bo bida, habri bo curason y laga Cristo Hesus drenta.(Romanonan 10:9+10+11),
Sinceramente, Pastor Marcel Balootje.
