Aruba Lo Ta Anfitrion di Su Prome Congresonan Grandi di Testigonan di Jehova for di 2019
Despues di un pausa di tres aña debi na e pandemia, un di e organisacionnan di congreso mas grandi na mundo a bolbe scoge Aruba como anfitrion di un evento internacional di tres dia: e Congreso Regional 2023, titula “Tene Pasenshi”!
Prome cu 2019, generalmente den luna di juli y augustus, testigonan di Jehova tabata yena lugarnan di evento durante nan congresonan anual. Na 2020, e pandemia a interumpi e tradicion ey. Testigonan rond mundo a para nan eventonan en persona y a tene nan virtualmente na mas cu 500 idioma. Na Aruba, e aña aki e congreso lo ser presenta den tres idioma: Ingles, Papiamento y Spaño. Pa e fin di siman aki nos lo cuminsa cu e prome congreso na Papiamento riba 11 pa 13 di augustus 2023. Di dos na Papiamento ta di dia 18 pa 20 di augustus. Y di tres ta di 25 pa 27 di augustus na Spaño. Tur tres congreso lo tuma lugar na Hilton Aruba Caribbean na Palm Beach. Pa mas informacion tocante fecha y lugar di e congresonan, bishita jw.org.
Frankie Herms, vocero di testigonan di Jehova, a bisa: “Nos ta masha contento cu e ultimo tres añanan aki nos por a gosa di nos congresonan na un manera completamente safe pa nos mes y pa comunidad. Pero e experencia di topa asina tanto cara conoci personalmente den un grupo grandi, esey si a haci hopi falta y nos ta masha contento cu e aña aki nos ta bek en persona.”
Lo tene rond di 6000 Congreso rond mundo como parti di e serie di Congreso di 2023 “Tene Pasenshi”! di diabierna pa diadomingo. E ta parti den seis seccion di mainta y atardi. Lo analisa e cualidad pasenshi y lo destaca su importancia den nos tempo, uzando diferente ehempel biblico. Despues di e seccion di diasabra mainta, lo tin bautismo en persona. Tambe, diasabra y diadomingo atardi lo presenta un drama graba, cu ta consisti di dos parti.
E programa lo cuminsa diabierna 9:20 AM – 5:00 PM. Diasabra 9:20 AM – 4:35 PM. Diadomingo 9:20 AM – 3:45 PM.
Segun Herms: “Como cristian, nos tur kier tin pasenshi. Pero tin ora, no ta facil. Tin hopi cos cu ta pone nos pasenshi na prueba. Nos tin sigur cu, despues di pasa tres dia analisando kico ta pasenshi y con e por yuda nos den diferente area, nos lo ta mihor prepara pa deal cu algun di e retonan cu nos ta enfrenta.”
Testigonan di Jehova tin mas cu 100 aña ta tene congreso publico den stadion, sala deportivo, lugar di congreso y teatro rond mundo. Na 2022, despues cu a kita e restriccionnan di e pandemia, nan a cuminsa bek cu reunion mas chikito y predicacion publico. Awor, den 2023, lo ta e prome biaha cu nan lo reuni na un evento mucho mas grandi atrobe rond mundo.
E congreso ta habri pa publico y no ta pasa collect. Pa mas informacion tocante e programa of pa busca otro lugar y fecha di e congreso, bay na jw.org y selecta e tab “Tocante Nos.”
