Ministerio Publico a informa diamars cu Landsrecherche a detene diamars 13 di febuari 2024 den ora di mainta, ex minister plenipotenciario Sr. Guilfred Besaril den e investigacion cu ta hiba e nomber di “Tulipan” cu ta regarda iregularidadnan cu a sosode na Arubahuis.
E investigacion Tulipan ta dirigi su mes riba iregularidadnan na Arubahuis den e periodo di 2018 te 2021. Duirante e tempo aki, Besaril tabata den funcion como minister plenipotenciario di Aruba na Hulanda.
Nota di redaccion:
E caso aki a cuminza lora ora cu na Mei 2021 a cuminza circula e-mail nan anonimo cu tabata conta un cantidad di asuntonan. E momento ey e e-mail nan anonimo a wordo tuma na consideracion pa asina laga haci un investigacion manera debe ser. Cu tempo a bin haya sa cu aparentemente e e-mailnan anonimo a wordo manda pa Eddie Paris cu tambe tabata ocupa funccion na Hulanda.
Asina cu e gobierno nobo a wordo forma y riba e promer dia di Gabinete Wever Croes II, a pidi Central Accountant Dienst pa haci un investigacion riba e alegacionnan anonimo treci den e-mail. Asina a start un investigacion cu a encera un team grandi di Aruba cu a investiga y por a traha un rapport di constatacion. E rapport aki a keda atendi pa varios departamento manera DRH, etc. y despues Promer Minister di Aruba Sra. Wever Croes publicamente a informa di a entrega e rapport na Ministerio Publico pa verdere onderzoek.
Den transcurso di e trajecto aki, dia 13 di december 2022, Promer Minister a acudi na parlamento cu e rapport y unda Central Accountant Dienst a trece varios informacion dilanti di loke nan a topa cune na Arubahuis.
Por bisa cu ta promer ves cu un promer minister di pais ta hiba informacion parlamento unda cu ta trata di un persona di su mes un partido. Anteriormente Mike Eman no a hiba informacion parlamento ni di Paul Croes ni di Benny Sevinger y menos di e escandalo di corupcion den RDA unda hendenan prominente di AVP a horta 21 miyon florin. Porcierto ta bon pa puntra: Con a para cu e robo miyonario aki cu AVP a haci den RDA? Nan lo get away with murder? Ta cua man tin poni riba nan cabes? y Dicon?
Corupcion ta algo cu ta wordo haci scondi. Importante ta cu ora e keda descurbi, e wordo investiga pa wordo proba y aclara y pa husticia wordo haci.
Na e momento aki mester bisa cu e caso ta den investigacion y den pleno desaroyo. E investigacion mester determina si tabata tin cosnan cu a sosode intencionalmente pa horta pais Aruba, of ta cosnan cu administrativamente a wordo haci robes, dor di por ehempel keda sin reken af cosnan di uso personal.
Pa loke ta trata e caso di Arubahuis, por compronde cu ta trata di algun uso di credit card di Arubahuis pa tank gasolin, como tambe algun pago di restaurant, cual sumanan no ta surpasa 20 mil florin.
Caso RDA ?
Di otro banda, caso di RDA unda cu prominentenan di AVP a horta placa, tin por ehempel un produccion di un video cu a costa pueblo 99 mil florin. Un video cu bal mas hopi cu oro y diamante! Asina tin un projecto di Alpen cu a costa 5 miyon florin y ora gobierno a cambia a bin haya 2 container di 20 pia, carga cu sushi. Asina tin tambe compania di marketing cu a cobra 1 miyon florin, sin presta servicio, sin contract por escrito, tur cos telefonicamente. Tambe tin trahadornan cu tabata declara na hora di trabao telefonicamente, sin ningun registro. Pues, e gang di corupcion di RDA, lo get away with murder? Ta bon pa Ministerio Publico contesta pueblo tambe riba dicho caso.
