ORANJESTAD – Awe tabata e fecha cu Hues a stipula pa Fundacion DUCAPRO y Q-Waves laga sa con a bay cu e negoshacion cu a palabra 23 Februari 2024, durante e caso sumario.
SOLO DI PUEBLO por a compronde cu Hues a stipula pa e radio emisoranan di Aruba negosha cu DUCAPRO y pa laga sa awe con a bay. Negoshacion a tuma lugar pero no a yega na un palabracion. Esey ta nifica cu awor tur cos ta den man di Hues.
E caso sumario cu DUCAPRO a cuminsa contra Q-Waves ta pa Hues prohibi Q-Waves transmiti cancionnan na radio cu tin derecho di autor. Tratamento di e caso a dura bastante caminda Hues a intermedia pa mira si e partidonan lo por sinta na mesa y yega na un palabracion riba e tarifa di pago. E partidonan ta encera tur e radio emisoranan di Aruba y DUCAPRO.
INTERMEDIACION DI HUES
Durante tratamento di e caso, abogado mr. Sjiem Fat di Q-Waves a bisa cu ta prefera di negosha cu BUMA-STEMRA. Hues a bisa cu BUMA-STEMRA ta un organisacion na Hulanda cu ta representa artistanan pa haya derecho di autor y cu tin un acuerdo cu DUCAPRO di Curacao. Hues a haci tanto mr. Kock di DUCAPRO como mr. Sjiem Fat di Q-Waves diferente pregunta. Hues a remarca cu Q-Waves no por exigi pa sa di e acuerdo entre DUCAPRO y BUMA-STEMRA. Abogado mr. Sjiem Fat a mustra cu DUCAPRO ta bin cu tarifanan pero Q-Waves kier atende cu BUMA-STEMRA. Hues ta haya cu e problema ta e tarifa. Hues a bisa cu e asunto ta pa negosha tarifa. Q-Waves kier claridad cu kende nan ta negosha y kico ta wordo haci cu e placanan. Ariba pregunta di Hues, abogado mr. Kock a bisa cu e por laga traha e carta cu DUCAPRO cu e ta representa BUMA-STEMRA. Hues a intermedia pa mira si por yega na un solucion pero cada vez ta pega riba e asunto di tarifa. Señor Croes a cuestiona e condicionnan cu DUCAPRO ta stipula esta cu mester tin un bista cla riba e maneho di radio emisoranan na Aruba. Esey e radio emisoranan no ta di acuerdo.
RADIONAN Y DUCAPRO MESTER NEGOSHA
Na dado momento abogado mr. Sjiem Fat a bisa cu si DUCAPRO kier sinta na mesa pa yega na un areglo di tarifanan, Q-Waves ta dispuesto. Hues ta haya cu e solucion ta pa e partidonan sinta na mesa pa yega na un solucion. Hues ta haya cu mester sinta na mesa cu tur radio emisoranan. El a puntra si Q-Waves tin un tarifa cu por stipula pa temporalmente, pendiente di e negoshacion pa yega na un areglo cu DUCAPRO. Q-Waves a bisa 250 florin pa luna como tarifa simbolico. Mr. Kock no ta di acuerdo cu e tarifa simbolico. E abogado a bisa cu e tarifa ey ta mas abao cu anterior tabatin negosha. E ta kere cu mihor Hues menciona un periodo pa e partidonan sinta na mesa y yega na palabracion cu tur radio emisora. Mr. Kock a bisa cu e periodo mester ta dentro 2 luna. Q-Waves a bay di acuerdo pa tur radio emisora sinta na mesa cu DUCAPRO. Hues a pospone e caso pa awe 24 April 2024. Hues a bisa cu si no yega areglo lo sigui den Corte.
HUES MESTER DICIDI
Por a compronde di director di Q-Waves cu e negoshacion no a yega na nada ainda y cu radio emisoranan lo kier sigui negosha pero Hues lo por bisa cu e ta bay tuma un decision.
Awor ta Hues mester dicidi cu lo sigui den Corte of e ta fiha un fecha pa tuma un decision.
