Dia 1 di september, Aruba a celebra Dia di Prensa. Un dia pa nos reflexiona riba e rol importante y esencial cu prensa tin den democracia di nos pais. Mi ta gradici tur esnan cu ta traha den media. Danki pa boso esfuerso y dedicacion continuo den boso rol pa fortifica democracia y informa nos comunidad. E ta importante pa prensa por ehecuta su trabou na un manera independiente na beneficio di Pueblo di Aruba.
Un di e pilarnan ancra den nos estado di derecho ta libertad di expresion y e ta trece cierto responsabilidad cu ne, entre otro pa duna informacion corecto y berdadero na nos comunidad. Ban proteha e libertad di expresion aki y aplica e derecho aki na un forma responsabel. Ban fortifica e colaboracion entre prensa, gobierno y tur departamento gubernamental. Nos mester mira y trata prensa como un partner pa yuda Aruba sigui progresa. Danki pa informa, educa y entretene nos comunidad. Sin libertad di prensa, no tin libertad.
