Sobreturismo no ta un tema cu a bin di sopresa, e no ta un fenomeno nobo cu awo merece nos atencion. Aruba su identidad a bin ta wordo bendi bloki pa bloki, e problema no ta e ambicion pa prosperidad, e problema ta cu no a realisa of no tabata kier a realisa cu ta basta.
Loke si ta soprendente, uno cu por wordo cualifica como e luz di speransa ta cu porfin esnan encarga cu infrastructura y turismo a sa di habri wowo, a sa di scucha su pueblo cu ya di 2018 a demostra basa riba mas cu 10.000 firma cu mester stop e construccion decontrola di mas hotel y condominium. Na 2019, RAIZ, lidera pa Ursell Arends a organisa e simposio “The Road to Sustainable Tourism”, unda nos a enfatisa e necesidad pa duna prioridad na desaroyo di eco-turismo.
For di principio, RAIZ a bin ta adverti riba e efectonan negativo pa nos pais si no transforma turismo masivo den un turismo sostenibel y responsabel. Si no cambia e vision di Aruba Tourism Authority (ATA) pa no solamente ta e miho agencia cu ta atrea turista mundialmente, sino pa enfoca riba un turismo di calidad cu no ta bai a costo di nos naturalesa. Nos ta contento di por mira cu e cambionan aki a wordo presenta y cu muy pronto lo cuminsa wordo implementa pa asina di berdad nos atrae bishitantenan cu tin respet y aprecio pa nos balornan natural.
RAIZ semper a bisa claramente cu e proteccion di Aruba su recursonan natural ta un prioridad, mientras cu nos ta promove un desaroyo sostenibel. Nos ta reconoce cu Aruba su dependencia economico riba turismo ta real, pero tambe ta necesario pa hinca un enfoke mas balansa, cu ta pone proteccion di nos medio ambiente den e centro di tur decision. RAIZ ta orguyoso di wak cu mas y mas politiconan a adopta nos principio fundamental pa duna naturalesa su bos den e arena politico. Esey ta un señal cu e raiz di e simia cu nos a planta pa bienestar di nos naturalesa ta floreciendo firmemente den nos comunidad y tambe den e maneho di turismo.
Mientras cu otro politiconan apenas ta alcansando e discusion aki, nos ta sigui proactivo. E movecion di activismo cu ta tumando lugar awo riba nos isla ta algo cu por a wordo ancitipa. E ta algo cu no ta pasa na Aruba so sino mundialmente. Activismo ta algo cu ta wordo mira malo, pero na mes momento, politiconan por mira esaki como un aliado natural cu ta boga pa miho regulacion y practicanan pa un turismo sostenibel na Aruba. ta un manera pa. Ta facil pa alsa bos ora cu e problema ya a yega su peek, pero berdadero liderazgo ta consisti den anticipa, planifica y actua prome cu e problemanan surgi.
Ora cu RAIZ a drenta gobernacion, un di e prome preguntanan cu nos a haci ta, cuanto contrato mas mester purba wordo kibra pa nos tin moratorium real di e construccion di mas hotel of condominio? Den tur esaki a stimula dialogo cu inversionistanan cu tabata dispuesto, pa conforme ley y conforme proteccion di nos identidad cultural, respeta nos naturalesa. Tambe mescos cu na 2018 a pidi conforme ley diferente documento, manera social-economic impact assessment y environmental impact assessment, pa tur proyecto tambe esaki a wordo haci y sin lubida tendiendo di consehonan di departamentonan concerni.
RAIZ tey pa sigui ta e bos di naturalesa den tur discusion y na tur mesa di negociacion. Nos lo sigui boga pa tende di e conseho di expertonan den conservacion di medio ambiente y no solamente esnan guia pa interesnan partidario of populista.
Ta berdad, cu awo cinco pa 12 ta cuminsa vocifera cu tey traha via maneho pa preveni cu hotelnan den futuro por wordo expandi. Cu awo na 2024 tey cuminsa regula sobreturismo. Pero RAIZ ta kere cu ainda nos ta na tempo, tin hopi mas cu por wordo haci pa salba e partimonio natural di Aruba.
RAIZ lo sigui lidera e caminda pa un maneho di turismo responsabel.
