Pa falta di respet y obediencia na e palabra di Dios, dificultad ta drenta bida di hende, pasobra no ta importa si bo ta rico of pober, gordo of flaco, bon studia of cu menos educacion, e respet y obediencia na e palabra di Dios ta e balansa pa nos bida.
Ora den un cas yuinan no ta respeta, nos por hala atencion di e mayornan, pero ora mayornan mes no ta respeta, nos tin cu tene cuenta cu nan no tin respet ni obediencia pa e Palabra di Dios y ta pesey nan no tin autoridad den nan cas.
E palabra di Dios ta tur cos pa nos, pasobra esun cu no ta tuma e Palabra di Dios na serio, simplemente no tin seriedad den su bida, y tin hopi chens pa e cay den bagamunderia y inmoralidad.
No ta por nada ta para scirbi den Juan 3:36: Esun cu ta kere den e Yiu tin bida eterno, ma esun cu no obedece e Yiu lo no mira bida, ma e furia di Dios lo keda riba dje.
Pa falta di conocemento y respet pa e palabra di Dios, hopi hoben ta den mal caminda, y esey ta bini pasobra nunca nan mayornan a mustranan e seriedad y obedencia na palabra di Dios.( Oseas 4:6).
Den Juan 14 :13 Hesus ta bisa: Tur loke boso pidi den Mi nomber, esey lo Mi haci, pa e Tata wordo glorifica den e Yiu.
Den Juan 14:14 Hesus ta bolbe bisa: Si boso pidi algo den mi nomber lo mi hacie.
Pero esaki no ta tur cos, pasobra Galationan 5:19-21 ta bisa nos kico nos mester libra nos mes di dje pa nos hereda e reino di Dios.
Tambe den Santiago 4:4 E palabra di Dios ta bisa cu amistad cu mundo ta enemistad cu Dios. Esey ta nifica cu nos no mester mescla nos mes den e sistema di e mundo aki cual ta guia pa diabel, pa asina nos ta evita di ta envolvi den inmoralidad, inhustia y corupcion cu ta abunda riba e mundo aki.
Ora un yiu no ta honra su mama y tata, e no ta cana den seriedad cu Dios,
Ora un homber ta casa y tin varios muher e no ta cana den seriedad cu Dios.
Ora un hende ta biba un bida di orguyo y mentira, seriedad cu Dios no ta presente den su bida.
Aki nan no tin cuenta di husgamento,ta e berdad mester wordo proclama den tur skina pa asina hende por arepenti y bini na Cristo y ricibi bida eterna.
Ora un hende ta meti den bruheria y otro obranan y organisacion di scuridad, e no tin respet di palabra di Dios.
Caso mas extremo, ta e odio y falta di pordon cu Dios ta spierta nos di dje bisando:
Ken cu ta odia su ruman ta un matado, y boso tur sa cu ningun matado no tin bida eterno ta permanece den dje.( 1 Juan 3:14-15).
Esun cu no ta stima su ruman ta permanece den morto, pasobra nos tin cu reconoce cu un bida yena cu pleito ta un bida spiritualmente morto.
No stima e mundo,ni e cosnan cu tin den mundo. Si un hende ta stima mundo, e amor di e Tata no ta den dje.
Pasobra tur loke tin den mundo, e deseo di carni, y e deseo di wowo, y e orguyo di bida,no ta bin di e Tata, sino di e mundo.( 1 Juan 2:15).
Nos mester di seriedad y respet pa e Palabra di Dios.
Sinceramente, Pastor Marcel Balootje
