Vanessa ta forma parti di e organisacion di Hospital Carnival Group (HCG) y durante un evento cu a tuma luga recien, a yama tur miembro di e comision padilanti. Niun tabatin idea cu esaki tabata parti di un setup p’un sorpresa grandi. Na momento cu miembronan di Hunta di Directiva a cuminsa menciona diferente caracteristicanan y tarea di un persona cu a sobresali ainda e no a realisa ful kico tabata pasando. Asina cu ela realisa esaki y a mira su famia bula su dilanti e tabata sumamente emociona. Un momento special cu nunca Vanessa lo lubida cu e nombramento di empleado di luna di december 2024.
Vanessa Winterdal ta secretaria di directiva di Hospital y a wordo nomina pa su excelente trabou den regla diferente asunto sea ta pa notula durante reunion of pa yuda tras di cortina pa sigura cu cosnan ta cana bon. E sa bon su rol y funcion y particularmente den e area di biahe y acomodacion e ta haci un tremendo trabou. Vanessa semper ta dispuesto pa yuda y ta haci su maximo esfuerso pa cualkier evento cu e ta yuda cune ta uno exitoso. Coleganan ta admir’e pa su determinacion y actitud positivo. Colegialidad sigur no falta y Vanessa semper ta alegre y gusta pusha y tuma iniciativa pe trabounan keda cla. E mes ta ripara ora un colega tin mester di yudansa y ta ofrece esaki hasta sin cu e wordo pidi.
Specialistanan temporario y/ of personanan cu e ta duna guia na Aruba ta duna super bon comentario y feedback di Vanessa locual ta confirma su contribucion valioso ne team. E ta haci mas di loke ta wordo spera di dje y ta tuma pasonan extra pa sigura tur cos ta bon regla te den e ultimo detaye.
Vanessa ta un tremendo teamplayer cu dedicacion y pasion pa su trabou. Su participacion den team HOH ta contribui na un tremendo ambiente laboral cu resultadonan sin iguala pa su departamento na HOH. Pues, ela wordo scogi merecidamente como empleado di luna. Hunta di Directiva, management y tur colega ta super contento di tin Vanessa den team HOH. Pabien Vanessa!
