Mainta ta defende corupcion, atardi ta controla integridad di candidato pa minister ?
E papel di Raad van Advies (RvA) ta crucial pa nos sistema di gobernacion. E organo aki ta un di e pilarnan di democracia, proporcionando conseho legal riba proyecto di ley y desaroyo gubernamental. Pero si e mesun hende cu ta dirigi e instancia aki tin un historial di defende caso di corrupcion, ta corecto pa e tin un rol tan importante den e sistema?
E Responsabilidad di Presidente di Raad van Advies
Segun e ley di screening pa minister, e presidente di Raad van Advies mester analisa e antecedente y integridad di esnan cu ta dirigi e pais. Pero por ta razonabel di cuestiona: si e mes ta defende corrupcion, con e por ta apto y confiabel pa controla integridad di otro hende?
Conflicto di Interes?
Si nos ta papia di transparencia y bon gobernacion, un pregunta fundamental ta: Esun cu ta defende corrupcion por ta realmente neutral den un proceso di screening? Si su cliente a haya un sentencia di 4 aña di prison pa corrupcion, no ta obvio cu e presidente di Raad van Advies a defende un acto ilegal? E ora, con e ta husga na manera obhetivo integridad di otro?
Un Posicion Problematico
Imagina un scenario den cual un abogado ta defende un caso di corrupcion den hora di mainta, y den hora di atardi e ta analiza antecedente di un candidato pa minister. No ta ironico cu e mesun persona ta controlando e mesun tipo di acto cu e tabata defende anteriormente? Esaki ta trece duda riba su capacidad di discerni loke ta etico for di loke no ta.
E presidente ta padrino di bruid di Eman?
Mas peor awor: e presidente no ta padrino di bruid di un candidato cu e mester controla ?
Ken ta Controla su Trabou?
E pregunta final y kisas mas importante ta: Ken ta controla e trabao di Raad van Advies y di su presidente? Si un organo tan importante por tin un lider cu su rol y integridad ta den duda, kiko ta e mecanismo pa controla cu e ta cumpli su deber manera mester ta?
Garantia di Neutralidad
Pa nos sistema di gobernacion por funcciona manera debe ser, nos mester tin transparencia y confianza den nos institucionnan. Si tin un conflicto di interes, nos como pueblo tin derecho di exigi claridad y seguridad cu e persona cu ta dirigi RvA realmente ta neutral. Sin esey, e sistema ta core riesgo di bira un circulo di influencia unda integridad ta algo relaciona cu coneccion, enbez di responsabilidad.
E ta ora pa cuestiona, investiga y exigi claridad. Transparencia no ta un luho, ta un necesidad pa proteha democracia.
Nos ta pidi y si ta necesario tambe nos ta exigi reaccion di Gobernador y di Raad van Advies tambe.
