Tur hende sa kiko ta impotencia sexual pero impotencia politico kiko esey ta? Impotencia sexual ta cu bo tin gana di haci algo pero bo no por. Igualmente impotencia politico ta ora cu tur e gobierno nan cu a bai nos dilanti supuestamente tabatin bon intencion y hopi gana di haci lo corecto pero no tabata por. Awor mescos cu den e promer caso mester usa influencia ajeno pa toch logra bo gana nos a jega den e situacion cu nos gobierno pa logra haci loke e tin gana di haci y cu mester a worde haci hopi tempo caba tin e oportunidad pa usa un influencia ajeno pa logra.
INSTITUTO ESTATAL
No ta cu nos no tin e saber y instrumento nan pa hacie nos mes pero nos structura politico na Aruba ta di tal indole cu nos politico nan no ta logra. E structura politico ta caracterisa pa un escala hopi chikito unda tur hende conoce otro y ta sea famia of amigo di otro. E politica tradicional a worde hiba cu regalamento di cos (Grijs den pasado) of nombracion den gobierno of otro beneficio nan manera tereno y permiso.
Na Aruba nos tin mayoria di mesun instrumento cu Hulanda tin. Hulanda tin Raad van State y Aruba tin Raad van Advies, Hulanda tin Algemene Rekenkamer Nederland y Aruba tin Algemene Rekenkamer Aruba, Hulanda tin De Nederlandse Bank y Aruba tin Centrale Bank van Aruba. E unico diferencia ta cu Hulanda ta duna su entidad nan hopi mas respet y valor cu Aruba ta duna esun di dje.
Ora cu Hulanda hanja un advies di Raad van State nan ta tene debido cuenta cu esaki y na Aruba nan ta pidi conseho di Raad van Advies pasobra ta procedura pero e decision gobierno/minister a tuma caba y ta solamente detayes tecnico legal nan lo tene cuenta cu ne. E decision lo no worde cambia mas. Den caso di e banco central ta mesun cos. Ora De Nederlandse Bank duna un opinion tur hende ta scucha pero na Aruba a jega di sosode cu gobernante nan a chercha di loke nos banco central ta bisa. Pa ultimo si nos wak e posicion di nos rekenkamer no ta nada mihor. Ora den recien pasado Algemene Rekenkamer Aruba a duna un conseho y advertencia cu tur bon intencion “Laga nos no lubida cu si nos no tin nos cas na ordo otro lo kier bin pone na ordo pa nos” esaki a causa un consternacion di otro mundo. Y kiko nos ta wak ta sosediendo awor? Hulanda kier bin pone ordo pa nos. Na Hulanda a jega di sosode cu gobierno y Tweede Kamer ta den un clinch sin salida unda ningun di dos no kier duna den. E ora Tweede Kamer ta bisa ok laga nos pidi Algemene Rekenkamer haci un investigacion y bin cu un opinion. E ora si mesora gobierno a acepta pa laga su ambtenaarnan wak e asunto un biaha mas pa por bin cu un compromiso. Eynan bo ta wak ki peso e nomber solamente di Algemene Rekenkamer tin na Hulanda pa gobierno y Staten Generaal.
DIDACTORIAL
E manera didactorial cu Hulanda kier a implementa su ayudo no ta aceptabel pero na mesun momento manera cu diferente hende a scirbi “Don’t let a good crisis go to waste!”. Hulanda ta ofrece di nan mes voluntad pa pone fondo, experticio, recurso etc. disponible pa juda nos soluciona problema nan cu door di impotencia politico nos mes gobernante nan no por a soluciona. Door di e crisis di coronavirus awor nos tin e oportunidad pa cu judansa di Hulanda pone nos cas na ordo sperando cu e futuro gobierno nan no bolbe haci un desaster.
Un asunto cu mesora ta bin na mente ta e asunto di un aparato gubernamental mucho grandi y ineficiente en combinacion cu un overtollighedspool cu ta costa placa so. Esaki ta un problema cu nos gobierno nan impotente di pasado no por a soluciona. Laga Hulanda encarga su mes cu e solucion di esaki. E lo costa placa pero na e momento nan aki Hulanda ta dispuesto pa gasta esaki basta cu e postema aki worde elimina.
Asina por menciona hopi mas problema manera entre otro diversificacion di nos economia y pone nos finanzas na ordo unda cu Hulanda kier pone placa, experticio y recurso disponible pa juda soluciona nan.
Naturalmente e ta den favor di Hulanda tambe pa juda nos pasobra si nos economia nan crash na un cierto momento tur vuelo di KLM pa Hulanda lo ta jen di hende di Aruba, Corsow y St. Maarten cu no tin trabao ni porvenir mas. Hulanda no por nenga e hende nan aki pasobra nan tin paspoort EU/Hulandes. E consecuencia pa Hulanda ta e ora cu nan tin pa e hende nan aki e gasto di bijstand, vivienda, salubridad, scholing etc. etc. cu kizas ta bai sali nan mas caro cu e ayudo cu nan a nenga di duna.(Mira e exodo tempo di independencia di Surnam y cierre di Lago).
Aruba mester probecha awor pa haci un acuerdo cu Hulanda cu ta juda Aruba soluciona problema cu nos mes te awor tabata impotente pa soluciona. Y si nan ta encera medida nan impopular semper nan lo tin e excusa pa bisa cu ta Hulanda a pone nan hacie.
VOX POPULI VOX DEI
Ora nos cas ta na ordo ta keda naturalmente e ora na nos pueblo votador cu tin manera Betico tabata bisa e poder absoluto Vox Populi Vox Dei (Voz di Pueblo ta Voz di Dios) pa controla y percura cu nos gobierno nan den futuro mantene e ordo den nos cas. Si un gobierno no ta haci e trabao manera debe ser e pueblo votador no mester vacila ningun momento pa manda nan manera den deporte pa bai tuma un asiento ariba banki y wak con otro si ta haci e trabao manera debe ser. No ta gobierno ni parlamento ta manda pero ta e pueblo votador.
Sperando naturalmente cu e gobierno nobo tambe no ta sufri di impotencia politico.
Drs. Ling Wong
Ex- Hefe di Economische Zaken Aruba
Ex-Presidente Bank v/d Ned. Ant.
Ex-Presidente Aruba Investment Bank
Ex-Miembro di Algemene Rekenkamer Aruba
