Diabierna 13 di juni, miembronan di e comision fiho pa companianan di gobierno y utilidad (CONVNBE), bou presidencia di parlamentario Clifford Heyliger, a bishita WEB Aruba pa un encuentro informativo y educativo riba produccion di awa y energia na nos isla.
Durante e bishita, e delegacion a reuni cu gerencia y miembronan di staf tecnico di WEB, unda nan a ricibi un presentacion detaya tocante e rol esencial di WEB den nos infrastructura nacional. E presentacion a cubri temanan importante manera: Produccion sostenibel di awa y energia, innovacion y eficiencia operacional, mantencion di tarifa cu ekilibrio entre acceso y sostenibilidad, capacidad y stabilidad di red y impacto ambiental y compromiso cu sostenibilidad
Despues di e presentacion, e parlamentario y miembronan di comision a participa den un tour educativo den plantanan di produccion di awa y energia, pa mira di cerca e proceso y tecnologia cu ta sostene nos bida diario.
“Nos ta aprecia e transparencia y e dedicacion cu WEB ta mustra den nan trabou pa sigura un suministro confiabel y sostenibel,” segun parlamentario Heyliger. “Esaki ta un paso importante pa fortalece e relacion entre Parlamento y e sector di utilidad, y pa sigura cu decisionnan futuro ta basa riba conocemento y dialogo.”
