Parlamentario Endy Croes ta lamenta masha hopi algun expresion di Gerlien Croes cu el a expresa siman pasa net promer cu el a sali pa Paraguay.
Minister Gerlien a realisa su di 3 biahe riba custia di pueblo den apenas 4 luna di trabou y ta conta cu 30 dia den exterior den 120 dia di trabou. Na su salida pa Paraguay recien Gerlien a declara den prensa algun precupacion den enseñansa cual nos lo ripiti awe y lo reaciona riba nan.
Necesidad pa educador ta hopi grandi:
Gerlien Croes a splica cu e necesidad pa educador ta hopi grandi. Algo cu Gerlien a descubri apenas awor. Comokiera cu constantemente Gerlien ta den exterior y kisas no a pone atencion debido na esaki y awor finalmete e ta biba cu e realidad berdadero di Aruba. Ta algo cu for di basta tempo ta conoci den e veld di enseñansa. Bo trabou como minister ta pa bin cu solucion.
Hopi docente ta sali for di veld of ta bay traha duna les na otro pais:
Gerlien Croes a declara tambe den prensa cu hopi docente ta sali di e veld bay hasi algo otro y tin hopi ta bay duna les na otro pais manera entre otro Bonaire. Segun Gerlien como cu e salaris pafor di Aruba ta mas aantrekkelijk y e condicionnan ta mihor. Pues palabranan di Gerlien. Nos ta reacciona puntrando Gerlien Croes ta den cual mundo e ta biba? Hustamente Gobierno anterior Gabinete Wever Croes 2 a traha riba un structura di salario nobo pa docentenan y a laga esaki cla pa un conseho final na DRH. Mira Bo ‘overdrachtsdocument’!
‘Adviescommissie’ Restructuracion Salarial di Maestronan:
‘Aviescommissie’ aki di cual SIMAR a forma parti a traha desde november 2023 riba un conseho pa e minister anterior. E conseho final aki ta firma pa tur experto incluso SIMAR. Nomber di e documento ta ‘Leerkracht Beter Betaald, Onderwijs Beter Behaald’.
A laga esaki cla cu 4 opcion pa por escohe for di dije. Desde Juli 2024 e documento aki tabata na DRH pa conseho final pa asina por ehecuta un decision momento aña escolar nobo 2025-2026 inicia. Opcion 1 ‘gelijktrekking’ varios schaal cu lo costa rond 4.6 miyon plus despues di ‘gelijktrekking’ un aumento di 4% pa tur schaal cu un costo di 6.7 miyon. Total esaki lo costa gobierno 11.3 miyon pa aña. A laga 500 miyon florin di Surplus den caha pa por ehecuta esaki. Kiko ta e problema real cu ainda Gerlien serefina den jet no por a duna poco mas atencion y contenido real na esaki? Gerlien kisas ta demasiado den avion? Por a nota cu den 4 luna di trabou como Minister Gerlien a biaha na 3 ocasion. A bay Hulanda, Republica Dominicana y actualmente ta na Paraguay mientras scol ta den habri y e salaris di docentenan no a wordo regla. Parlamentario Croes ta lamenta e forma di traha di Gerlien Croes y a bisa cu poco mas boluntad, amor y pasion pa Bo trabou Bo por a logra esaki pa e aña escolar 2025-2026. No obstante esaki Gelien Croes a corta 2.9 miyon den enseñansa 28 di maart 2025 momento e Coalicion nobo a aproba e presupuesto 2025. Mas tristo ta cu actualmente den presupuesto supletorio cu ta na Parlamento y lo wordo trata awor den luna di Augustus Gerlien ta bay corta otro 3 miyon den enseñansa hustamente den salaris di docentenan. Ta yega ora pa Gerlien duna cara di berdad na docentenan. Modela y saca selfie kisas ta bon pa bende Bo mes pero banda di esaki trabou di Minister ta pa tuma decision y ehecuta un plan. Nos lo keda haci nos trabou pa controla gobierno y informa pueblo.
