Prome cu tur cos, Endy nunca a mester “admiti” nada. El’a keda cla cu e proyecto di stadion, faltando algun trabao chikito, pero ningun trabao grandi mas. E prueba cu Stadion ta cla, ta e certificacion di Fifa unda varios wega internacional ya ta tumando lugar y Gerlien mes ta acudi pa precensia e weganan.
E palabra “admiti” cu Gerlien a usa, ta solamente un intento pa crea un storia politico, pero no un realidad.
Gerlien “cabes duro” no por compronde 2.5 miyon vs 7 miyon!
Ora Endy a bira minister na 2021, el’a bin haya Stadion den un ruina y afgekeurd. Ainda nos tabata tempo di covid-19, y no tabatin placa pa hasi e renovacion completo di Stadion. Dor di “squeeze” e placa, a logra pone disponibel e prome 2.5 miyon florin riba mesa pa cuminza cu un parti di e renovacion, cual tabata e fase di tribuna, cual a wordo traha completamente nobo.
E tono di Gerlien, ta zona comosifuera cu e proyecto a subi den costo/gasto sin motibo, pero Gerlien no ta conta e berdad: E 2.5 miyon original tabata solamente pa renova un parti di stadion y no otro partinan.
Durante e proceso, a haya mas fondo disponibel y e proyecto a wordo amplia pa inclui: Turf nobo, pista di atletismo nobo, renoba palonan di lus, renoba instalacion di coriente, adkeri lusnan na standard rekeri pa Fifa. Tur esaki tabata nesesario pa logra certificacion pa e stadion, algo cu a wordo logra y cu ta pone Aruba riba mapa di deporte.
Cheapshot y sin logica
Weganan internacional awor por tuma lugar na Aruba
E alegacion di Gerlien, usando 2.5 vs 7 miyon, ta proba sea su insinceridad pa e realidad, of kisas su jaloezi, kisas su rabia/odio, of entodo caso un actitud no corecto pa cu deporte, ni contra ex minister di deporte, cu no merece un critica asina low, asina baho, unda kier crea un storia cu e gastonan a sali mas di loke mester ta.
Si Gerlien ta kere cu tur esaki, turf, baan nobo pa athlethiek, lus, electricidad, tribuna nobo y mas por a wordo hasi cu solamente 2.5 miyon florin, e ta sigui biba den den su mundo di fantasia.
Esei ta un cheap shot, un intento barata pa crea duda, y francamente, hopi stom.
Papia ta facil, pero traha y entrega un proyecto real ta e reto cu no tur hende por logra.
A pasa 5 luna y keto bay Gerlien ta cu e yabi di Stadion, ningun adelanto. Deporte no merece ningun tardansa, sigur ora tin 500 miyon di surplus y loke falta pa termina ta menos di 180 mil florin.
