Ora un hende ta confia, sirbi y warda riba Senjor e lo no keda bergonsa pasobra Senjor lo ta su defensa, pasobra Senjor ta cumpli cu Senjor su promesa, Senjor ta cuida esnan cu ta confia den dj’E, nunca Senjor lo no bandona ni tampoco desampara esnan cu ta confia den dj’E.
Nos no ta confia den Senjor pa locual cu E por haci pa nos, pero nos ta confia den Senjor pa ken E ta, E ta Dios, E ta Todopoderoso, E ta tur cos pa nos, no tin pa iguala cu nos Dios, pesey nos ta confia, nos ta kere y nos ta warda riba Senjor.
Distraicion riba mundo tin hopi , y cada dia ta bini mas, awor aki mundo ta enfrenta un sistema di inteligencia artificial, cu por inventa noticia falso, trece enemistad, rebaha hende, especialmente pa esnan cu ta huse contra e siervonan di Dios, y contra e palabra di Dios.
Esaki ta e sistema cu lo hiba hende den decepcion, pasobra hende lo kere mas den e sistema artificial aki cu nan ta kere den e palabra di Dios.y nan lo bay kere ora e sistema aki cuminsa bisa cu Cristo a aparece aki y aya , y lo lanta hopi cu lo bisa ta nan ta e Cristo y nan lo ganja hopi hende.( Mateo 24:4-5).
Pero e palabra di Dios ta bisa lo siguiente: Pasobra scritura ta bisa: Ken cu Kere den dj’E lo no keda brongosa.( Romanonan 10:11).
Aunke den cualkier situacion cu nos hanja nos mes aden, nos mester sigi confia Dios y no entrega, pasobra ta Dios mes por saca nos for di e situacion.
Daniel a wordo tira den cueba di leon, hopi a pensa cu lo ta su final, pero nan a lubida cu esun cu a crea leon ta mesun Dios di Daniel, y door cu E ta E creador e tin poder riba leon, pesey mes e a sera boca di e leon, pa motibo di e confiansa di Daniel.
Ora nos wordo ataka, no ta momento ta desea malo pa hende, zundra pasobra esey ta deseo di e enemigo, pa abo cu ta sirbi Dios, cuminsa pidi malo pa hende, locual bo tin cu haci ta , haci manera David y no papia malo ni tampoco haci malo, pasobra e Dios den cual bo ta confia lo ocupa su mes di tur cos.
Di berdad ningun di esnan cu ta spera riba Bo lo keda brongosa, esnan cu ta trangresa sin motibo lo keda brongosa.
Ora bo sa y bo sa cu bo ta den boluntad di Dios,bo no mester di tin miedo,pasobra Dios ta cu bo, y Dios lo bay bo dilanti den tur situacion, bo no ta perde nada ora bo ta den boluntad di Dios.
Hende nan cu ta cana den caminda di bruheria, y caminda di maldad, semper ta kere cu nan por adelanta Dios, pero esey no ta berdad pasobra prome cu bruheria existi Dios tabata existi, pesey abo cu ta kere den Dios lo no keda brongosa.
E angel di Senjor ta campa rond di esnan cu ta tem’E y ta rescata nan. ( Salmo 34:7).
Pasobra brasa di e malbado lo wordo kibra, ma Senjor ta sostene e husto. ( 37:17).
Y di berdad tur hende cu ta desea di hiba un bida santo den Cristo Hesus lo wordo persigi.(2 Timoteo 3:12.
Pero Dios tey tur momento pa proteha esnan cu ta confia y kere den dje, hasta den nos sonjo Dios ta cuida nos.
Sinceramente, Pastor Marcel Balootje
