Aduaneronan ta reclama placa di gasolin; Enbes cu Minister cumpli, e ta sinta wak facebook, kico aduaneronan ta skirbi

0
584

Diaranzon mainta, Eduard Maduro di sindicato SADA a informa comunidad cu Gobierno no ta pagando placa di gasolin na Aduaneronan. Aduaneronan ta traha cu nan auto priva pa nan acudi na varios sitio pa haci control riba container. Ya ta pa varios luna cu e coleganan no ta hayando nan placa di gasolin, segun Maduro a bisa. Diaranzon a reuni cu director di Aduana, unda a informa cu Aduaneronan ta hopi hopi rabia. Segun Director di Aduana, e problema ta sinta na DRH, cu no ta cumpliendo pa paga e suma aki. Esaki a conduci cu fin di luna, un bes mas e coleganan no a haya e placa riba nan salarisslip. Diaranzon a tuma lugar reunion cu director, pero no a sali nada afo.

Maduro a bisa cu nos ta den un crisis, y e situacion ta pisa hopi cerca e coleganan, pasobra nan tin cu core di pa Sanicolas pa Noord, nan si a usa nan placa, pero gobierno no ta cumpli. Ta lamentabel ora bo ta wak cu gobierno si ta keda draai riba su contractant, renoba contract, pero e coleganan cu ta traha dia den dia afo, usando nan auto priva, usando nan placa pa pone gasolin, y mientras gobierno no ta cumpliendo.

Director di Aduana a bisa cu e lo bolbe manda un carta. Sinembargo esaki no ta un noticia alentador pa e coleganan, segun Maduro a bisa. Segun SADA cu di masha tempo caba mester a manda un carta pa minister y no mester a sigui manda carta pa DRH mas.

Ne momento aki, Maduro a bisa cu nan lo bay aserca Minister President, pasobra DRH ta cay bao di Minister President. E areglo aki ta for di 2017, cu a bini na vigor cu aduaneronan cu ta traha den dicho departamento di control, ta haya un auto toelage.

Ne momento aki tin un debe di 4 luna di auto toelage pa e Aduanderonan, pues nan tin 4 luna sin cobre. Maduro a bisa cu e ta manda un apelacion pa Minister President pa pidi’ele un reunion pa atende esaki. Loke ta pasando no ta husto. Si manyan cu nan dicidi cu nan no lo sali mas cu nan auto priva, di tur skina lo tende critica.

“Mi ta spera cu esaki yega na nan oido, pasobra bo ta haya un minister cu ta dirigi Aduana, no ta tuma accion riba e cosnan aki, pero si ta tuma accion riba cosnan menos importante, por ehempel, nos a haya hopi colega cu ultimo dianan aki a wordo “op het matje geroepen” pa cosnan cu nan ta pone riba facebook, anto bo ta haya un minister enbes di cumpli cu trahadornan ta bay sinta wak riba facebook kico un hende ta skirbi of no, y esey sigur ta di lamenta”, Maduro a bisa.

Coleganan a duna nos instruccion pa manda un carta pa Minister y pa pone un deadline. E carta di sindicato lo sali tambe pa director.

LEAVE A REPLY

Please enter your comment!
Please enter your name here