Director di Departamento di Aviacion Civil a informa recientemente riba e cantidad di turistanan cu a yega nos isla desde cu frontera a habri, pero tambe a splica riba e departamentonan cu ta haciendo un gran esfuerso pa asina tur cos cana bon na airport.
Sr. Kelly a bisa cu nos ta wak bek awe atrobe na un weekend hopi exitoso na aeropuerto cu tiki tiki ta wak cu e cantidad di vuelo ta aumentando. Si resumi desde prome di Juli te cu awor nos ta wak un total di 13.751 pasahero a drenta Aruba. Di eseynan 11.035 ta turista y 2.716 no ta turista. Esey ta e cifranan di prome di Juli ora e frontera habri te cu 26 di Juli 2020. Tambe nos por wak e pasaheronan cu ta a bin di Merca specificamente, nos ta haya cu e cantidad di mas grandi di turista a bini for di New York y e segundo luga ta Miami y despues ta siqui Newark y na di cuatro ta Charlotte y despues nos ta haya Atlanta y na ultimo nos ta haya Fort Lauderdale.
Tiki tiki nos ta genera datos door di ATA tambe a wordo uza pa e analisa e turista nan cu nos a haya y tambe proyecta e porcentage pa e mercado nan cu ta biniendo. Poco poco tur cos ta cuminsa activa tambe na aeropuerto. Na aeropuerto tin un team di personanan cu ta trahando duro y ta hopi dedica pa hasi esaki posibel. Sr. Kelly a enfatisa cu nos ta papiando di front liners di DVG cu ta na aeropuerto, e team di Hospital, cuerpo di douane, IASA. Eseynan ta e organicasionan, e front liners cu ta hasiendo un tremendo trabou na aeropuerto y tambe mester bisa SETAR y GAMMA cu ta dunando un tremendo apoyo pa loke ta e online datas. Nos ta gradici tur cu ta aportando di nan banda pa realisa esaki, ban sigui cu e bon trabou y otro siman lo duna un update atrobe.
