Den un acto di sinberguenseria y falta di respet pa e pais Aruba, un grupo di supuesto ambientalistanan a purba interumpi e celebracion oficial di Dia Nacional di Aruba, causando desordo y discordia mientras ministernan y pueblo tabata presenciando e evento nacional di Himno y Bandera. Ta lastima pa mira con individuonan politisa ta purba kibra un ocacion asina importante cu nan protestanan egocentrico y desinforma.
Enbes di uni cu e celebracion nacional, e manifestantenan aki a dicidi di pone pancarta y grita lemanan, y grita cosnan mahos, culpando e gobierno actual pa e supuesto destruccion di naturalesa y exigiendo pa stop construccion di hotelnan nobo of pa basha nan abao. Sinembargo, kiko e hombernan aki ta lubida ta cu e gobierno actual no ta responsabel pa e decisionnan di pasado cu a resulta den aprobacion di proyectonan di construccion ni pa e presunto daño na naturaleza.
Si nan ta berdaderamente interesa pa proteha naturalesa y pa stop construccionnan di hotelnan, pakiko nan no dirigi nan criticanan na es políticonan cu tabata na poder ora cu a duna e permisonan y a tuma decision cu supuestamente a causa daño na medio ambiente? Pakiko nan no protesta dilanti di e cas di partido AVP, kendenan a causa e degradacion di medio ambiente na Aruba?
Ta bochornoso y desilusionante pa mira con e grupo chikito di individuonan politicamente liga, ( Kinsasha RED) ta presta nan mes pa e tipo di espectaculonan bochornoso, probechando un ocacion nacional pa promove nan agendanan partidista y pa sembra discordia enbes di busca solucionnan constructivo y colaborativo pa e problemanan real cu Aruba ta enfrenta.
Enbes di mancha e Dia Nacional cu nan accionnan irrespetuoso, e protestantenan aki mester reflecciona tocante e berdadero proposito di nan activismo y dirigi nan esfuersonan den un otro forma, batiendo na porta di bestuurskantoor, pa hunto y na mesa repasa cualke inquietud. Gobierno di Evelyn Wever Croes a bisa cu nan ta cu porta habri pa ricibi cualkier grupo den comunidad y pa scucha nan inquietud y alaves esclarece atrobe cualkier ponencia. Ta e gobierno actual a laga trek in un cantidad grandi di permiso pa hotel otroga pa AVP.
Pakico nan no ta protesta contra Benny cu Mike? Acaso ta miedo nan tin? Of nan tambe ta riba remote control ?
