Aruba a duna un caluroso bonbini na Celebrity Ascent durante su yamada inaugural na waf di Oranjestad. E ocasion a conta cu un ceremonia special di intercambio di plakaat abordo, uniendo asina lidernan di e barco crucero hunto cu representantenan di waf y turismo local.
Presente tabata Monica Bos – Cruise Manager di Aruba Tourism Authority, hunto cu Irvin Gil – Nautical Manager di Aruba Ports Authority, y representantenan di Port Agency Maduro & Sons, oficialmente a obsekia Capitan Anastasios Kafetzis y su tripulacion un plakaat como tradicion maritimo. E intercambio aki entre e oficialnan local y capitan di e barco crucero ta crea un lazo fuerte y aprecio mutuo entre Aruba y Celebrity Cruises.
“Nos isla ta ofrece un experiencia unico pa nos huespednan, y cu hopi placer nos ta comparti e bunitesa, cultura, y hospitalidad di Aruba cu e huespednan abordo. E bishita di Celebrity Ascent na nos isla sigur ta algo realmente special,” tabata palabranan di Monica Bos.
Celebrity Ascent, e barco crucero di mas nobo di crucero Edge Series di Celebrity Cruises ta ofrece un experiencia luhoso y inovativo pa su pasaheronan. Conoci pa su diseño unico y cu facilidadnan di clase mundial, Ascent tin acomodacionan cu bista impresionante di laman, un jardin captivante riba e dak, un dek amplio, y restaurant di luho presenta pa Chef di strea Michelin. Cu sostenibilidad central di su diseño, Celebrity Ascent ta ekipa cu tecnologianan ecologico cu ta sostene practicanan di crucero mas berde.
Cu yamada di bonbini na barco crucero Celebrity Ascent, Aruba ta reafirma su compromiso pa ofrece experiencianan inolvidabel pa su huespednan, y fortifica su posicion como un destinacion di primera clase den Caribe.
