E homber cu a wordo haya morto den un flat na Gravestein Bilmeer na fin di maart a keda identifica como Johnny Ponson, un residente di 65 aña. Segun algun medio ta trata un Arubiano. Polis a bisa cu e homber a perde su bida dor di un crimen. Recherche ta investigando, pero ainda tin hopi pregunta.
Riba diabierna 30 di maart, polis a ricbi un keho di un conoci di e victima, cu a indica cu e no por a tuma contacto cu e homber. Patruya a bay na e cas y a haña Ponson morto y a cuminsa un investigacion.
Awor a keda revela cu Ponson di 65 aña a ser mata, pues un crimen. Hopi cos no ta conoci tocante e homber y p’esey polis ta pidi contacto cu hende cu por conta mas tocante Ponson y su bida. Polis tambe a pidi pa testigo di personanan cu a mir’e of a papia cune prome cu su morto.
Te cu (12’or di merdia) Solo di Pueblo no por a confirma cu e homber aki ta un Arubiano, manera otro medionan a informa.
