A aproba e relato financiero 2019
ORANJESTAD, Aruba – 3 di juni 2021: Arubaanse Voetbal Bond (AVB) a tene un reunion extraordinario cu tres punto cardinal riba agenda. A trata e relato financiero 2019, discharge di e directiva y tambe presupuesto 2021. E clubnan tur tabata presente pa sigui e reunion di cerca y na final a aproba e puntonan.
Ing. Richard Dijkhoff, presidente di AVB, a expresa cu durante e reunion aki a conta cu presencia di diesshete ekipo. E clubnan presente a haya un splicacion completo riba e relato mes, e gastonan cu tabatin y entradanan via e federacionnan internacional. Pero tambe kico tur tabata e maneho cu AVB a hiba.
“Nos a haya e preguntanan al caso y hasta algun skerpi. Tur hende tabata kier sa unda ta aloca e fondonan. No solamente unda ta aloca e fondonan, pero tambe e exigencianan cu ta bini di FIFA. Den e reunion di diaranson nos a presenta esey. Despues cu e clubnan a haya contesta riba nan preguntanan, na final sala a aproba e relato financiero. Tambe a duna e directiva discharge. Cu esey a cera e proceso pa aprobacion di relato financiero 2019”, asina Richard Dijkhoff a splica.
E presidente di e federacion di futbol di nos pais ta hopi contento cu un biaha mas AVB a haya sosten di e clubnan, pasobra nan a para tras di locual e federacion ta haciendo. “AVB ta e clubnan”, tabata e palabranan di e presidente di AVB. Loke e federacion haci ta p’e clubnan. Algun a remarca cu nan ta desea di mira adaptacion, pero por lo general esaki tabata bon acepta. Esaki ta duna AVB mas animo pa sigui cu nan bon trabou.
