Bo ta papia di dios, pero bo no ta papia di e 7 doctrinanan di Cristo-Hesus pa su iglesia

1. Bautismo.

 E bautismo ta na ora di nacemento, cu ta e principio di nos bida Cristian y pa nos bira yiunan di Dios Tata y tempel di Spirito Santo. Bijbel Mateo 28: 19 – 20, Cristo-Hesus ta bisa na Su apostelnan: “Bay pues y haci tur pueblo bira Mi discipelnan y bautisa nan den nomber di Tata y di Yiu y di Spirito Santo y sinja nan warda tur loke Mi a manda boso. Mira, Mi ta cu bosonan tur dia te na cabamento di mundo.” Bijbel Huan 3: 5-6; “Hesus ta responde: Enberdad, enberdad Mi ta bisa boso, si un hende no nace di awa y Spirito, e no por drenta den Reino di Dios. Loke a nace di carni, ta carni y loke a nace di Spirito, ta Spirito.”

P’esey tur e babynan recien naci, nan mester wordo bautisa pa nan bira yiunan di Dios Tata, tempel di Spirito Santo y pa nan bida eterna cuminsa. Tambe pa medio di bautismo e pika original di Adam y Eva ta wordo kita.

2. Eucaristia.

E Santa Eucaristia den Misa, ta pa nos sigi corda riba Cristo Hesus Su sacrificio den e Santo Comunion y pa nos sigi mantene contacto cu nos Senjor. Na unda Hesus a bisa den e Ultima Cena, ora E’l a kibra e pan: “Haci esaki pa keda corda riba Mi y esun cu come Mi carni y bebe Mi sanger, lo haya bida eterna.”

Bijbel Lucas 22: 19-20; “Despues Hesus a cohe e pan, a gradici Dios, a kibr’e, a duna nan y a bisa: Esaki ta Mi Curpa cu ta entrega pa boso. Haci’e pa boso corda riba Mi. Di e mesun forma, E’l a cohe e Copa despues di Cena y a bisa: Esaki ta e Copa di Aliansa Nobo confirma cu Mi Sanger, cu lo ta derama pa boso.” Bijbel Huan 6: 53 – 54; “Hesus a responde nan: Mi ta sigura boso, si boso no come Carni di Yiu di hende y no bebe Mi Sanger, boso lo no tin bida den boso. Esun cu come Mi Carni y bebe Mi Sanger tin bida eterna y Ami lo lant’e for di morto riba e ultimo dia.” Akinan den Misa pa medio di Sacerdote, e Hostia consagra ta bira Curpa y Sanger di Cristo Hesus.

3. Confirmacion.

E doctrinanan aki ta pa nos scohe e direccion di nos bida pa ricibi e 7 donnan di Spirito Santo y pa nos madura den bida Cristian. Esaki ta mescos ora cu e Apostelnan a ricibi e Spirito Santo riba dia di Pentecoste. Bijbel Echonan 2: 1 – 4; “Ora fiesta di Pentecoste a jega, tur e siguidornan di Hesus tabata hunto na e mesun lugar. Diripiente un sonido manera un biento fuerte a bin for di cielo y a jena henter e cas caminda nan tabata. Algo manera candela a parece, E’l a parti Su mes na lenga cu bay para riba cada un di nan. Nan tur a keda jena cu Spirito Santo y a cuminsa papia otro lenga segun Spirito Santo tabata inspiranan.” Pa medio di Obispo cu ta pone man riba e persona, e ta ricibi e 7 donnan di Spirito Santo y na unda tambe e ta confirma su bautismal.

4. Confesion.

Esaki ta ora cu nos desvia y cay den e bida di pika y nos kier bolbe bek riba e caminda di Dios. Anto e doctrina di Confesion, ta na unda Dios ta pordona nos pikanan y ta purifica nos alma pa medio di un Sacerdote. Bijbel Huan 20: 21 – 23, akinan Hesus ta bisa na Su Apostelnan, cu ta Hesus Su prome Obisponan y Sacerdotenan: “Un biaha mas Hesus a bisa nan: Pas sea cu boso. Manera Tata a manda Mi, asina Mi ta manda boso. Despues di e palabranan aki E’l a supla riba nan y a bisa: Ricibi Spirito Santo. Na esnan kende su pikanan boso ta pordona, nan ta keda pordona y na esnan kende su pikanan boso no ta pordona, nan no ta keda pordona.” Akinan Cristo Hesus a duna Su Obisponan y Sacerdotenan e autoridad pa pordona pika. Por haci Confesion 1 bes pa luna.

5. Matrimonio.

Akinan ta ora un pareha kier comparti nan bida cu otro den un aliansa di amor. Den Misa dilanti di un Sacerdote, Dios ta uni e pareha den matrimonio y nan lo bira un solo curpa pa Dios y e pareha por uni den nan relacion sexual, pa nan forma famia. Bijbel Marko 10: 6 – 9: “Ma Na principio tempo di creacion, Dios a traha nan como homber y muher. P’esey e homber lo bandona su tata y su mama, pa e uni cu su muher y e dosnan aki lo bira un curpa. Asina pues ya mas nan no ta dos persona, ma nan a bira un solo curpa. P’esey loke cu Dios a uni, hende no ta permiti di separa.” E palabra, cu Dios ta uni e pareha den un solo curpa ta significa, e homber no ta donjo mas di su mesun curpa, pero su senjora. E muher no ta donjo mas di su mesun curpa, pero su esposo.Y Dios no ta reconoce divorcio. E pika di adulterio ta condenabel.

6. Orden Sacerdotal.

Akinan ta ora un hende homber ta wordo jama pa Cristo Hesus, pa e pone su mes den sirbishi di Dios y pa e bira un ministro di Dios, pa e guia y pa e administra Dios Su doctrinanan of Sacramentonan. Bijbel Marko 3: 13 – 15; “Hesus a subi sero y a jama esnan cu E tabata kier y nan a bin cerca dj’E. Asina E’l a forma un grupo di 12 cu E’l a jamanan apostelnan. Ela scohe nan pa nan companj’E y pa mandanan predika, cu poder pa saca demonionan. Bijbel 1 Pedro 2: 9; “Ma bosonan ta un generacion escohi, sacerdotenan real, un nacion santo, Dios Su mes Pueblo pa cu boso lo anuncia accionnan glorioso di Esun cu a jama boso for di tiniebla na Su lus admirabel.”

7. Enfermonan of Santa Oleo.

E doctrina aki, ta ora un persona ta malo of hopi malo, e por ricibi e Santa Oleo pa medio di un Sacerdote cu ta resa cun’e. E azeta consagra di Santa Oleo ta pa e persona por wordo sana spiritualmente di su pikanan y tambe p’e wordo sana fisicamente di su enfermedad p’e cuminsa un bida nobo. Tin biaha Dios ta sana e persona spiritualmente so, pa e persona prepara su mes pa e duna cuenta di su bida dilanti di Cristo Hesus. Bijbel Hacobo 5: 14 – 15; “Tin hende malo cerca boso? Lag’e jama ancianonan di Iglesia, laga nan resa p’e y hunt’e cu azeta den nomber di Senjor. Y e peticion ey haci cu fe, ta cura e hende malo, Senjor ta lant’e y si e a haci pika, Senjor lo pordon’e.” E Santa Oleo, ta wordo administra pa Sacerdote, sea na cas of na hospital.

Seferino Tromp