Un investigacion nobo riba gran escala a recopila evidencia cu ta sugeri cu e uzo di sildenafilo, e principal componente di Viagra y otro remedi uza pa tratamento di disfuncion erectil, por yuda proteha e celnan celebral di e malesa di Alzheimer.

E estudio, publica na principio di luna den e revista Journal of Alzheimer’s Disease, a wordo dirigi p’e cientificonan di Clinica Cleveland (Ohio, Merca) u ta basa riba analisis di dato di hallazgo anterior cu a asocia e medicamento cu un reduccion di casi 70% den e incidencia di e malesa.

Den e oportunidad aki, dokter Feixiong Cheng y su ekipo a inspecciona dos base di dato (MariketScan Medicare Supplemental y Clinformatics), di unda nan a tuma dato di “pashent real” cu nan a tuma di sildenafilo of un di e cuater medicamentonan cu cual a compara su efectividad.

Despues di organisa y stratifica e cifranan pa genero, edad, rasa y comorbilidad, e expertonan a haya cu e personanan trata cu sildenafilo a presenta un probabilidad reduci di entre 30 y 54%, di ta diagnostica cu Alzheimer, compara cu e remedinan di control. “Nos a uza inteligencia artificial pa integra dato den multiple dominio, tur den cual a indica e potencial di sildenafilo contra e malesa neurologico devastador,” Cheng a indica.

Tambe, e investigacion a revela cu e sildenafilo ta reduci e nivelnan di proteina neurotoxico tau, cu sa acumula den e celebro di e personanan cu e padecemento aki.

“E neuronanan trata cu sildenafilo a expresa gen relaciona cu e crecemento celular, un miho funcion celebral, un reduccion di inflamacion y otro proceso conoci pa proteha contra e degeneracion neuronal asocia cu e malesa,” Clinica Cleveland a señala den un articulo.

Cheng ta considera cu e conclusionnan aki “ta duna mas peso” n’e estudionan anterior cu ta respalda e existencia di un vinculo entre e medicamentonan pa disfuncion erectil y e reduccion di riesgo di Alzheimer y ta proporciona e “evidencia necesario” pa nan haci test clinico cu ta analisa mas profundamente su eficacia potencial.

Alzheimer ta un malesa cu ta rekeri cu urgencia di “terapia nobo”, Cheng ta opina, ya cu ta calcula cu actualmente ta afecta mas di seis miyon di Mericano y ta spera cu su incidencia triplifica pa 2050. Den e contexto aki e reuzo di remedi manera esaki, of otro existente pa fin terapeutico nobo, “ta ofrece un alternativa practico n’e proceso tradicional di descubrimento di remedi costoso y lento,” Clinica Cleveland a subraya.

LEAVE A REPLY

Please enter your comment!
Please enter your name here