Diabierna, 13 di november 2026, Gobierno di Aruba a activa e centro nacional di maneho di crisis (CMO) como consecuencia di e situacion di trafico aereo na Merca, debi na un problema den e sistema di control di trafico aereo. E situacion a afecta aproximadamente 10 vuelo entre Aruba y Merca, representando un total di alrededor di 1.500 pa 1900 pasahero cu no por continua nan biahe segun planificacion.

Durante conferencia di prensa, Prome Minister Mike Eman, acompaña pa Minister di Turismo, Transporte y Labor, mr. Wendrick Cicilia, a brinda un actualisacion riba e situacion, e coordinacion entre diferente instancia y e preparacionnan cu ta tumando luga pa atende cu e necesidadnan di pasaheronan cu mester keda na Aruba.

E mandatario a explica cu, considerando e magnitud di e situacion y e posibel impacto riba disponibilidad di acomodacion turistico, a duna e situacion un denominacion di crisis, activando asina e structura nacional di maneho di crisis.

Prioridad ta acomodacion y bienestar di pasaheronan afecta

Prome Minister Mike Eman a indica cu e prioridad inmediato ta pa localisa acomodacion pa e aproximadamente 1.500 pa 1900 pasahero cu tabatin planifica pa sali di Aruba durante e atardi y anochi di diabierna.

E mandatario a splica cu, considerando cu otro bishitante a yega Aruba y tin reservacion den diferente hotel, e disponibilidad di camber por representa un reto adicional.

Pa e motibo aki, e centro nacional di maneho di crisis ta realisando un inventarisacion intensivo di disponibilidad di acomodacion den hotelnan, apartamentonan y otro facilidadnan turistico riba nos isla.

Prome Minister a señala cu Aruba tin un sistema bastante centralisa den sector hotelero, loke ta facilita contacto directo cu e diferente hotelnan y permiti pa haya un bista mas cla di e capacidad disponibel.

Paralelo, ta tumando contacto cu otro localidad di acomodacion turistico pa identifica capacidad adicional y atende cu e necesidadnan cu por surgi durante e anochi.

Preparacion di facilidadnan alternativo

Como parti di e maneho di crisis, Gobierno ta contempla diferente scenario pa garantisa cu pasaheronan afecta por pasa e anochi den un ambiente sigur.

Prome Minister Eman a splica cu, en caso cu e disponibilidad di acomodacion convencional no resulta suficiente, lo evalua posibilidad di habilita otro facilidadnan pa acomoda pasaheronan temporalmente.

Entre e alternativanan cu ta contempla, ta uzo di salanan grandi di hotel, centro di convencion, facilidadnan na aeropuerto, centronan deportivo y otro espacio cu por wordo adapta pa e proposito aki.

E preparacionnan aki ta forma parti di un acercamento preventivo, pa asina por actua oportunamente en caso cu e situacion rekeri capacidad adicional di acomodacion.

Coordinacion entre Gobierno y diferente instancia

Durante e reunion di e ekipo nacional di maneho di crisis, diferente departamento, instancia gubernamental y representante di sector turistico a reuni pa centralisa informacion y coordina e esfuersonan necesario.

Entre e instancianan involucra tin CMO, Aruba Airport Authority, Aruba Tourism Authority, Departamento di Asunto Social, Cuerpo Policial Aruba y otro instancia cu tin un responsabilidad den maneho di e situacion.

Prome Minister a destaca e importancia di e colaboracion entre tur stakeholder, pa asina por atende cu e situacion di manera sistematico, eficiente y responsabel.

E mandatario a reconoce cu e inventarisacion y coordinacion ta representa un ehercicio intensivo, pero necesario pa garantisa contesta adecua na e desafionan cu e situacion ta trece cu ne.

Aruba ta prepara pa brinda su hospitalidad

Prome Minister Mike Eman a enfatisa cu, den situacionnan manera esaki, Aruba ta conta cu e hospitalidad, solidaridad y capacidad di colaboracion cu ta caracterisa nos isla.

E obhetivo ta pa brinda pasaheronan afecta un ambiente sigur y hospitalario durante e periodo cu nan mester permanece na Aruba, mientras cu ta sigui monitorea e desaroyonan relaciona cu trafico aereo na Merca.

Gobierno ta tene cuenta tambe cu e posibel impacto riba vuelonan cu mester yega Aruba, loke por influencia e disponibilidad di acomodacion durante e siguiente oranan.

Gobierno ta sigui monitorea e desaroyonan

Gobierno di Aruba, hunto cu e centro nacional di maneho di crisis y tur instancia concerni, ta sigui monitorea e situacion di cerca.

Ta recomenda pasaheronan cu tin un biahe planifica pa Merca pa mantene contacto directo cu nan compania aereo y sigui e informacion cu ta wordo comunica via e canalnan oficial di Aruba Airport Authority.

Gobierno lo mantene comunidad informa conforme cu informacion adicional bira disponibel y e situacion di trafico aereo na Merca desaroya.

E prioridad di Gobierno ta pa atende cu e situacion di manera coordina y responsabel, cu siguridad y bienestar di pasaheronan afecta como punto central, demostrando un biaha mas e hospitalidad cu Aruba ta conoci p’e.