Tiramento den un nightclub di LGBTQ, 5 persona a perde nan bida y 25 a keda herida, entre nan varios nan situacion ta critico. 

Colorado Springs, Colorado, USA:
Diasabra anochi prome cu mey anochi, un homber di 22 aña a drenta den un Nightclub di LGBTQ y mesora a cuminsa los tiro, matando asina como 5 persona y heridando como 25 otro. Danki na dos persona balente cu tabata den e club e momento ey, a cuminsa lucha cu e homber. hopi lihe nan a bin logra domin’e y preveni pa e homber sigui mata of herida mas persona.

Segun e chief di polis di Colorado Springs, e persona cu a los e tironan a wordo identifica como Anderson Lee Aldrich.
E tiramento a dura djis algun minuut. Den careda di 11.56 pm 911 a cuminsa haya un cantidad di yamada pareu. Den menos cu 1 minuut polis a sali bay direccion di e nightclub y den menos cu 5 minuut e homber a wordo aresta.
Un total di 39 agente policial y 11 ambulance a presenta hopi lihe na e sitio. Entre e 25 personanan herida tin varios cu nan situacion ta serio. E sospechoso tambe a wordo transporta pa hospital pa e heridanan cu e la ricibi, polis mes no a tira riba dje, pero mas sigur e la keda herida di e golpi nan cu e lo a ricibi den e bringamento cu e dos persona nan cu a logra domin’e y stop e di sigui tira.

E club caminda e incidente tristo aki a sosode yama Club Q.
Club Q tabata host un evento special diasabra anochi, cu a inicia cu un punk & alternative show di 9’or y  11’or a cuminsa un fiesta cu bailamente. E evento dedica na e celebracion y recorda cu dia 20 di November ta e dia di transgenero. E club tabata tin ful un programa festivo prepara pa e dia special aki. Riba e nightclub su website ta poni cu nan ta cera te proximo aviso. Club Q a wordo habri na 2002 y te recientemente tabata e unico LGBTQ Club den e cuidad aki.

LEAVE A REPLY

Please enter your comment!
Please enter your name here