Durante e competencia di Poeta di Patria 2022. Minister di Cultura Xiomara Maduro a dirigi palabra na un sala yen, cu a bin presencia e prestigioso competencia “Poeta di Patria, cu e aña aki ta wordo organisa pa di nuebe biaha. Un anochi special yena cu creatividad caminda tur esnan presenta por a presencia 15 talento, escritor, poeta y declamado presentando nan obra, durante cual cada un participante lo bay declama un poema expresando nan pensamento,  amor y sentimento pa nos patria stima, dunando nan miho elogio pa nos Pais Aruba y su cultura den nos dushi idioma Papiamento. E mandatario a comparti cu esnan presente cu poema ta un parti importante di arte y cultura di nos Pais y e ta un arte hopi bunita pa por toca e hende su curason of su mente, pa pon’e pensa, sinti of imagina. Tambe e ta enrikese nos capacidad pa uzo di nos idioma Papiamento. 

Segun Minister Xiomara Maduro su mes persona gusta poema y aña pasa, den mesun temporada asinaki na ocasion di ‘Dia Himno y Bandera’, ela a skirbi un poema cu ta un expresion di e amor cu e tin pa nos Pais Aruba y tin como titulo ‘Mi ta namora di mi Pais. E mandatario a comparti cu poema cu e publico presente y cu esaki e mandatario ta encurasha un y tur, specialmente nos hobenan pa skirbi poema. Minister Xiomara Maduro di Cultura ta encurasha hobennan pa uza nan abilidad pa expresa nan sentimentonan den un poema. Ta hopi bunita ora bo kier expresa bo sentimento, sea di alegria of di tristeza na un un persona, den un poema. E ta palabranan cu lo sali for di e mas profundo di bo alma. Ta masha importante pa nos inculca den nos futuro generacion e importancia di e arte aki, pa nan siña balora nos arte y cultura. 

E aña aki nos ta sinti falta di e Fundador di “Poeta di Patria”, sr. Atan Lee den feliz memoria, na cual e evento a wordo dedica. E no ta fisicamente mas pero su presencia lo keda semper den nos mente y curason. Atan ta un icono riba varios tereno, di entre otro protocol, ela encabesa varios  comision hopi importante den nos historia y tambe ta fundador di varios organisacion.

Minister Xiomara Maduro a trece dilanti cu aña pasa, como Minister di Cultura a reconoce Atan Lee durante un ceremonia na ocasion di 45 aña di Himno y Bandera, caminda a yame danki pa su  aporte y dedicacion na e Comision cu a inaugura nos Himno y Bandera y a gradici’e y su  famia pa nan contribucion. E mandatario a trece dilanti cu e maneho di su ministerio ta dirigi entre otro pa reconoce nos baluartenan na bida y ta hopi contento cu por a demostra e aprecio y gratitud pa Atan Lee. Atan ta e fundador di ‘Poeta di Patria’ y ta danki na su persona cu a mira e balor literario di Poema pa nos Pais Aruba, cu awe nos tin ‘Poeta di Patria’. Na tur ‘Poeta di Patria’, Atan tabata hiba palabra y aña pasa durante di su discurso Atan a papia tocante di entiero di antaño, ta Dios Todopoderoso so lo sa dicon Atan lo a scoge e topico ey pa su delaster discurso riba e tarima aki. 

Lo keda corda su ultimo palabranan den su discurso den cual ela expresa: ‘Mi alma ta sclama, Mi alma kier papia, Mi alma kier expresa, Scucha no y no Lubida…’. Atan, pueblo di Aruba ta gradici bo pa a pone e fundeshi pa “Poeta di Patria’ y lo cumpli cu bo deseo pa sigui motiva, inspira hobenan pa participa y continua cu ‘Poeta di Patria’.  Minister di Cultura pidi un aplauso pa Atan Lee y a gradici Atan su famia pa nan presencia na e anochi dedica na Atan Lee.

E mandatario a gradici e 15 participantenan di Competencia di Poeta di Patria, e arte den cual ta recita e aprecio, amor, stimacion cu cada un di nan tin pa nos Pais y su Cultura. Danki pa boso aporte na Arte  di nos Pais y pa carga nos Cultura den boso curason! Nos Pais ta rico na talento creativo cu ta expresa nan mes tremendamente bon den literatura y nos idioma. Aruba con chiki bo por ta, bo ta wordo semper respeta, bo a demostra esaki tambe riba tereno di Arte y Cultura.

Minister Xiomara Maduro a gradici e miembronan di hurado pa nan cooperacion. Tambe a dirigi un palabra di gratitud tpa Departamento di Cultura, Comision Celebracion Dianan Nacional, Fundacion Corector di Papiamento, pa organisa e prestigioso competencia ‘Poeta di Patria.

LEAVE A REPLY

Please enter your comment!
Please enter your name here