ORANJESTAD – Diaranson atardi Minister di Turismo sr. Dangui Oduber manera ta custumber a duna reconocimento na trahadornan di nos industria di turismo, e biaha aki na empleadonan di e cadena di Divi hotel. Den un ambiente ameno cu a tuma lugar na Alhambra Ballroom e mandatario a duna e trahadornan nan certificado y plakkaat pa e añanan di servicio cu nan a duna den nos industria mas importante.

Divi Resort a habri su porta na Aruba den aña 1969 bou di e nomber Divi Aruba y awe tin 5 resort di Divi na Aruba. 

1. Divi Dutch Village Resort

2. Divi Aruba Phoenix Beach Resort

3. Divi Village Golf and Beach Resort

4. Divi Aruba All Inclusive Resort

5. Divi Tamarijn All-inclusive Resort

Den e empleadonan cu a keda reconoci tabata tin cu a cumpli 5, 10, 15, 20 y asta uno cu a cumpli 40 aña di servicio. Tabata momentonan bunita pa tende cu sr. Michael Alexander Maduro tabata ta un embahador di nos turismo desde aña 1982. Michael a cuminsa cu 18 aña di edad, como un bus boy, despues na 1984 e la ricibi un promocion y a bira assistente di waiter pa despues na 1987 wordo promovi pa waiter, cual posicion e tin te awendia. Esaki sigur ta inspira e trahadornan mas hoben pa sigui traha na un manera ehemplar pa nan futuro.

Minister Dangui Oduber ta manda palabranan di felicitacion y aprecio na tur e empleadonan di Divi Resort. Cada un di bosonan ta contrubui grandemente cu e sector turistico, brindando servicionan di calidad na nos bishitantenan. Minister Oduber ta bay sigui brinda e tipo di reconocimentonan aki na nos embahadornan turistico, paso nan ta e weso di lomba di e industria importante aki.

Turismo ta nos unico pilar economico y ta e driver di nos economia.

LEAVE A REPLY

Please enter your comment!
Please enter your name here